【公園路之音】城都下晡三點

轉來到我原底咧坐的所在，景緻猶原攏無變。

走桌的店員都毋知換過幾水矣，當然毋捌我，菜單我看都無看，就點一杯美式清咖啡，雞卵糕欲佗一款愛去冰櫥仔遐揀，就點上頂頭彼个，香草口味佮刺泡。

蹛是蹛佇這箍圍仔，煞真久真久無來矣，嘛毋是起交繃袂爽或是人和氣味有各樣，有時仔就是按呢，起予別項代牽去，一站仔無來，有較久淡薄仔，感覺歹勢，就久久仔無去，落尾，就攏無來矣。

這是開咖啡店一步䆀，主顧客蓋重要，準無好禮仔交關嘛袂散。無疑悟，煞會無張無持就無來，無因端無事代，就是無來矣。

我就是這款人客，坐佇咧我往過四常坐的位，店內的裝潢無啥改變，天篷懸度仝款，há-lih猶原㧎佇遐，椅仔有換幾條，塗跤枋蛀去塌落就用跤墊仔疊懸，壁堵的海翁圖嘛無變，海報大細張和紹介的枋仔，閣有吧台前身形趨趨的海翁尪仔。

咖啡𠯗一喙，壁路倚天篷角仔的àm-phuh放出來的音樂我無聽過，毋是 Radiohead嘛毋是Sigur Ros，我的耳仔來開拆，有影是巷仔內的，自十幾冬前換人接手了後，這間店的音樂就是上利的，甚至是行佇咧通世界十八港路的上頭前，有店長的媠氣音感來牽抾，予咖啡和音樂攏真出擢。

頭tshih-tshih咧愖的我一下擔，店長對俺頭前傱出來，我驚一趒，伊掣一趒，隨喊我的名出來，嘛交代邊仔的店員⋯⋯這習慣無變，來遮的少年人，毋但是來食頭路，毋但是來捀盤仔，閣較濟是來和店長學習和人客陪綴，按怎做咖啡文化的好鼻獅。

和店長相借問，講幾句仔話，問某乜人今店開去佗位去⋯⋯店長就坦敧身楔入去吧台內底面。遐有一个所在，我毋捌入去，外場和咖啡予店員發落，自十冬前店長興做雞卵糕了後，伊就規工沬踮遐。

阮有當時仔會佇街仔路拄著，小擛手一下嘛無加講，較濟的是我踮面冊相著今仔日店裡攢好勢的雞卵糕寫真。伊注心佇遮，守佇咖啡廳上後壁彼个揜貼的灶跤，規心用伊的雙手共落尾入人客腹內甚至㧒掉的心血做予加圇，袂輸伊費心神揀音樂共這店的聲音氣味鋪排甲遐爾出眾，我是久久無來矣，伊就按呢來捏雕、做成，有十外冬矣。

咖啡店的下晡，時間行甲真勻，略略仔慢趖，我孤一人踮吧台，店滇蓬蓬人客有來有去毋過真罕，我越頭、看壁面的鏡，大部分的人佇咧看冊拍筆電，不時聽後壁桌的法國人開拆伊去過的東亞國家的民族性。

猶原是按呢，和我往過來的時仝款，店員無閒共咖啡豆仔倒入去機仔的漏斗觳仔，研做粉，用細支白鐵仔管水來沖，滴咖啡，斟入去杯仔內攪牛奶，落尾杯仔頓頓咧予牛奶泡出形。

踮這城都的大學區，咖啡文化上厚的所在，有成飄緻閒仙仙巴黎，鑠奅怪奇可比New York，人的頭殼貯的攏真文明。時間踮遮，嘛成做一款久長永遠。十冬來，朋友有的過往，有个徙離這搭圍仔，走个走，退出文青江湖的退出，我嘛是，久久無來矣，聽這生份掛新嫣的音樂，該當是電子音樂，板嘹是真貫串，有時顯、有時消，煏豆仔的聲，沙沙沙的毛斷，無攬無拈⋯⋯身軀邊有冊嘛無意思來反，手機仔有訊息也無愛看，規間店是鬧猜猜，我人佇咧焦枯寂微內底，時間踮城都的下晡三點，定去，賰咖啡，咖啡色的平面爾爾。

這音樂確實好，攑手機仔問Siri，這團號做Park Avenue Music，真拄好，這咖啡廳嘛徛城都上大的樹仔林公園邊，我轉來到我原底咧坐的所在的這葩，這篇文章，就號做「公園路之音」。

確實是好的，這的確是好。