南子吝步道：研色抾尖看蒼茫

南子吝，問在地人，台語號做：lâm-á-līn。

過一板橋，下跤溪水是清kia̍k-kia̍k，告示牌仔閣過，徛一間拋荒的古厝，枋仔路𤆬我去海拔196的終尾點。

聽講山面發草鋪甲齊勻齊勻予人比喻做日本的研茶（gíng-tê）。

山路peh起來真輕可，健行的人是插插插，見若彎斡歇跤，就通看山跤的漁港伴澳仔。

菅芒雙爿架，塗路對中破。

一略仔趨崎，一略仔坎仔，用四角石來鞏跤路，予人踏甲崩牙，一跡一跡。

看對爿面的山陵（suann-niā）鋪排，一支一支捅出來，排好好咧抾尖。

看對山跤去，海湧瀳起來拍踮湳仔石礁（南雅奇岩），轟轟吼無停，若大炮咧磅，水波予抐甲白雪雪。

咱攏是欲拚到山尾溜剪過蒼茫草洋踏踮山崁切著危險掠海中的基隆杙啊啦！