【城市浮冇】去餐廳彼代誌咱相拄會著

一、度針

手予澍兩下，可比予無形的手銬硞起來，一支銃就來對你的頭殼額矣。由在人khó落去，目睭小瞌咧，觱一聲，袂死。

店員瞭數字，面略略仔變，會失禮講有重耽。

溫度無蓋著，毋是過37.5度，是低甲傷譀。共齊眉掰蹛邊仔，閣來一改：

磅！

「借問一下先生是有發生啥物代誌是無？」

「無啦無啦拄運動過，檢采是汗煏傷濟予熱度失去。」

「喔喔，按呢喔，無就按呢啦！我來共你𤆬位，這馬人狹狹陣陣，一樓無位，愛勞煩你到二樓去，到頂頭會有人共你𤆬位。」

我就行對二樓去，心肝頭暗搬內心戲：

「攏無打緊啦！橫直我拄對冰櫥仔予抽（thio）出來。」

「冰櫥仔？殯儀館？敢講你是？」

「我是殭屍，足久無食飯矣，枵甲欲死⋯⋯無，是早就死矣。」

「歡迎光臨，準講是死，磅體溫是空，嘛無打緊，阮尊存所有的人客。」

「Hiô，恁服務真好liooh。」

二、徙位

「這位較暗，若欲看冊較無利便咧。」

「按呢喔人客，等有位閬出來，我才請你徙去較四序的所在。」

「Hiô，按呢勞煩你liooh。」

我就坐佇這位較倚樓梯頭的所在，見若有人上樓攏相拄會著，敢若較無遐清幽。而且，電火細葩甲，無夠光，看冊都看袂清看袂明，真想欲徙位。

越頭看，內底面是滇蓬蓬，人人食好料開講是蓋歡喜，無欲走的款，暫時無機會徙位liooh。

啊好啦，我就先屈咧！速速共菜點好，手機仔撏出來，罔掰罔等。

隨看著一篇文章，開拆CD的起氣和衰微，倒踏算唱片歷史銷了上好的八張專輯：第八是Fleetwood Mac，四千萬張，第七是Bee Gees，閣來是Eagles，Whitney Houston，我攏聽過咧，喙口就來哼”I Will Always Love You⋯⋯手機仔會出光，看甲真明，雖然獨對樓梯頭，現此時煞無啥人peh起peh落，閣真清幽，網路文章看甲興甲。喔，第四名是Meat Loaf，無聽過，Pink Floyd的《月之暗面》我高中有買過，啥貨！AC/DC是第二名，我敢有看毋著去？頭等佇我料算之內，Michael Jackson的Thriller，銷甲慄慄掣啦！

「這位先生，有倚窗、較光的膨椅仔位矣，我替你徙去。」

想講樓梯頭這所在嘛袂䆀，牢佇咧網路內底無想欲換。毋過，這餐廳服務真周至，主動替我捀甌仔過，我人就佇膨椅仔位矣。

這是倚窗通看外口大條街仔路的L形膨椅，坐起來軟㽎㽎，水晶燈照甲光颺颺。四序是真四序，煞對冷氣口，風遐大港對我這頭透過來，我徙這爿、徙彼角仔，攏會著風。

而且位傷闊，椅苴仔傷軟，顛倒無頭拄仔彼位遐好勢。

餐廳都服務貼心到這个坎站矣，我嘛歹勢去要求閣徙。

就覕佇咧膨椅上邊仔角，閃風避光，委屈家己勼牢咧。

三、聽話

袂輸人出世老爸老母無通揀，坐隔壁桌的食食客，是短短無夠兩點鐘的厝邊，嘛無通揀。

伊日時拄著的代誌，一草一木，歡喜和袂爽，絕對毋是講予你聽，你煞總聽著矣。

閣是一桌八个人。

想講趁暗頓趁餐廳有光，裝潢鮮沢新嫣，先去冊店摘（tiah）一本雜誌來，好來輕鬆讀輕鬆了解一寡仔時勢，認捌新的智識。

煞去予隔壁彼大桌大聲的牽去，牽入去辦公廳的扴膏口角，業務財務，垃圾代和氣身惱命的頂司。

害我心無佇我家己遮，擢（tioh）去別人遐，tiuh-tiuh銅仔你就⋯⋯。

姑不而將，就共家己埋佇咧食食和雜誌內底，看會當閃較遠咧無。

無疑悟，隔壁噗仔聲大大催落去，原來是上大箍彼个講欲請逐家食。

麥仔酒做一氣灌落去。

「你毋是會痛風，毋驚夯起來喔？」有人問大箍的。

「痛風是真艱苦，我無想欲慣勢嘛無法度。恁想看覓咧，彼跤關節會振動煞腫一癗㧎佇遐疼甲，見若行一步就搐一下，哎喲！」大箍的那講，眾人就綴咧哀一聲。

「一跤痛風夯起來閣通行，我上驚一改雙跤夯起來啦⋯⋯。」

伊按呢講，我的跤袂輸嘛搐搐疼矣啦。

四、納錢

「袂記得問，會當鑢卡無？」

「歹勢，阮遮干焦收現金。」

這聲害矣，無去張持著，我錢包仔現金紮少少，出門的時煞袂記得補，就共規內面的錢全戽出來。

好佳哉，紙票有夠。

閣有零星的尾數，我共銀角仔全倒出來，排踮櫃台頂面，愛76箍。我一箍一箍算，五十加兩个十箍，一箍銀一箍銀算有七个，過坎矣，有夠喔。

共銀角仔㧣出去，賰我人一箍遛遛啦！

◎刊佇《海翁台語文學》，225期，2020年九月。