【城市浮冇】孤一人蹛窵遠

讀《貝加爾湖隱居札記》，作者孤一个人蹛湖邊半冬，無現代利便，無網路電視，就守踮一間柴寮仔，上近的人家厝，佇五十公里外。

伊就共二月到七月、自冬入夏，彼穩居的大細項代誌、各款心情、伊看著感著的和心肝頭的思考，寫踮日誌內，敆做一本冊，出版上市煞來大銷大時行。

工業革命起磅了後，人類的生活去予替換改造，和大自然愈離愈遠，雖罔享受文明科技的聳勢，煞去予束縛，無通清心過日子。所致，彼款離社會遠遠遠，踮原始無濫摻的大自然過日的文學作品，就予濟濟的文明人來興來綿。

現代社會的開基祖英國有《魯賓遜漂流記》，仝英語系的美國是《湖濱散記》，相關的作品會當講是規山坪。準若毋是專門咧寫隱世離群，蓋濟小說嘛會掠來描述一款心靈的狀態，表達一種向望，唌人來讀落去。譬論村上春樹《海邊的卡夫卡》，十五歲的男主角離家出走，到四國島一座恬靜的私人圖書館覕鬚，閣予顧館的工作人員載去內山彼無人的柴寮仔暫蹛。

村上蓋了解現代人的枵想，共離文棄明的向望寫甲真唌人，袂輸名牌、性和無責無任的人生，準做商品，予讀者開錢來買冊來交關這無要無緊的價值小確幸。

論真講，孤一个人來過日，姑不將或家己主意，攏有影予人欣羨，《貝加爾湖隱居札記》話頭就按呢寫：

欲去進前紮冊，雪茄和 Vodka就好。若講別項物仔 ——空間、恬靜和孤獨——遐已經有矣。

我就予彼輕可、自在的飄撇唌去，浸佇這本冊內底。那讀那想講我若是伊，有半冬的時間踮湖邊過日，行李愛攢啥貨？紮偌濟冊（這上大頭）？著愛做乜代？

可比關佇籠仔內，監囚有真濟款，有人欲做老大、有人規工踅踅唸、有人日日寫批——我會是彼个興健身的人，規日揣空縫運動，共痠疼換做筋肉的定篤，用汗共關禁的束縛煏做大自由。

孤一个人蹛窵遠（tiàu-uán），死性的生活咱來黜去，敢若真自在，享受大自由，煞無陪綴無利便，顛倒是束縛，和關踮監牢是仝款的。

就按呢，毋但著煮食維持生理，讀冊思考予心理袂蔫，我閣愛來行勻、走標、泅水。

假使毋是冰天雪地，假使我通堅持透流。

讀《貝加爾湖隱居札記》，冊毋是冊，我是咧倒照看家己，是享受，是慾望，想欲浸佇咧闊櫳無濫摻的所在，共恬靜和孤獨當做Vodka，好好仔來𠯗（si̍p／tsi̍p），敬彼按怎消磨嘛消磨袂了的時間哩。

◎刊佇《海翁台語文學》，224期，2020年八月。