【城市浮冇】對海坪去

渡船頭到海坪的塗跤面是平坦坦，有寡幼沙糝糝，行起來袂滑溜，較成點揬，提醒你大海就佇頭前，色水和曠闊咧等你，毋通延延。

倒絞十幾冬前彼時來，嘛是寒人，海是袂耍得的媠，彼是干焦想欲坐渡船四界遨的癮，船幫到矣就拍票去坐，來到這出名的觀光地。看有公車就坐，踮巴士底浪蕩幌，過市街、郊外的學校，疏疏並木，行山路踅啊踅無疑悟就到上尾站，司機越頭問我：

你欲去佗位？

這斗就無通按呢浪溜嗹（lōng-liú-lian），某囝踮身軀邊，就愛張持寬寬仔行，渡船頭踏出去，當面的建築毋是水色就是艷，這是自在的所在，是欲來𨑨迌的，衫薄薄，鞋穿淺拖仔，就對海坪去。

好日子猶未到，街仔路真凊市。

海水冰，囡仔躡跤勼手，抾湧鬚爾爾，毋敢傷倚。姑不將，佇內底面𧿬沙，挖空一塌一塌，踮譀想的頂面硞硞坉沙，通囤偌懸就偌懸。

向海的山崁頂徛別莊，拋到後壁面有規排的飯店。

棕樹㧣風，無要無緊咧搖，有風有搖，無奈何。

喙就綴咧吟心肝頭的彼條歌，吟啊吟啊，就來按排行榜，這條歌，踮我人生濟濟所興的歌內底，通排第幾名呢？

有影是僫排，若準是彼歌手，我愛的伊的歌是蓋濟條。就因為傷濟條，我的愛煞去予扯去，孤一條進百大有，欲前十，是無法度。

我是遐爾仔愛彼共歌收入去的專輯啊！遐爾愛彼歌手啊！

海沙埔較過去，有主人用球咧操狗仔，練隊型，五六隻長毛狗傱來傱去，舌吐吐，蓋歡喜。

海水有影冰，嘛是有人毋驚gàn，踮湧內底咧挵，滾絞、絞滾、絞絞滾。

看有耍無干焦癮。

寒人這時，這城都毋知偌濟興耍鹹水的閒人，佇膨椅窞肚的所在，數念舊年的熱人：美麗的形影，幼膩好形的體格，暗頭仔海面貼天邊的雲尪。

風像吉他的弦，有頭無盡尾，我的頭鬃就順彼風來奏，像海坪的線延長長，零星耍水的人，散掖掖吟歌，沙仔頂的跤跡，延，閣延延。

◎刊佇《海翁台語文學》，222期，2020年六月。