【城市浮冇】幼膩頂真所成的

阿咦哇，我今會坐佇城都大車頭小角勢的這个倚仔位，是偌濟人頂真綿爛的日日粒積，按呢幾若代千千萬萬人所成的。

透早踮咖啡廳，人早就佇咧無閒矣，拍電腦，激頭殼，連絡大細項代誌，面憂面結拖咧嘛是愛行。查埔查某攏仝款，落地窗外口的食頭路人趕欲上班，跤步緊，心頭凝，今仔日就欲來捙拚囉。

尻脊骿對我，螢幕煞予我看透透，伊當咧鉸影片。畫面頓蹬，好來搝前搝後，促予短，撨予長，揀一个上好勢的動作，共彼粒網仔球拍媠氣。

料算伊是教練，光頭，無掛目鏡，當咧製作模範動作的見本，予學生來趁樣。

我䀐彼畫面，精差是遐爾仔細，煞撨摵甲，有影注心，有影綿爛。規个咖啡廳，規个城都的人，全咧無閒。逐家致心咧目睭前彼細細項的事代，為伊歡喜、躊躇、受氣、無眠⋯⋯上班時間的心思攏是工課、工課、工課，一點仔囡爾爾，食頭路人的緊張和計較，囥佇這大紡踅的城都，敢若無要無緊。

話講倒轉來，是人遐爾仔巴結，我才有通坐踮遮：燒沸沸的咖啡甌仔，踮塗跤底行的地下鐵，手機仔金滑束結的形體⋯⋯是這安排甲好勢好勢的教育系統予我有彼學歷和才調通坐踮遮，身軀帶彼習慣，頭殼安彼觀念，通瞭著網仔球教練，現場來分拆開破。

教練就來走，確實躼跤四壯，毋閣大細包揹三、四跤，人煞蝹落來，幔規身軀的烏衫，和街仔路暗淡的人七溶八溶，溶了了。

紲來，徛佇咧球埕，伊就是王，跤手猛掠，動作一流，啥人佮伊拚！

教練放出來的位，換人來坐，後一位的專業和注心，會是啥物貨呢？

就按呢一位塌一位，無瞑無日的細膩頂真，予我有法度坐踮遮，做一个現代人，做一个城都人，來成。

◎刊佇《海翁台語文學》，222期，2020年六月。