【城市浮冇】挪威的森林：孤單生疏離縫
飯拄食煞的中晝時，囡仔注心咧看冊，太太攑筆記數，我紲喙尾食檨仔和西瓜：客廳的聲說哪咧睏晝，是平坦坦的恬靜。
就來聽著音樂的前奏矣，我目睭神去瞭（lió），按太太的手機仔播送出來，伊講：「都過三十冬矣，閣有人聽，猶真好聽liooh。」
我和太太有仝款的心聲。
囡仔共冊放落，好玄這阿母阿爸時代的老歌，知影是伍佰，駛車時定定放，煞毋知歌名，我就來開破：
「這塊歌號做〈挪威的森林〉，歌名是按村上春樹仝名的長篇小說引來的，毋過，意思是舞毋著去。」
「是按怎舞毋著去呢？」囡仔共當咧讀的冊mooh踮胸坎。
「事實是，村上春樹的冊名，是按Beatles的歌引來的，村上嘛引毋著去矣。」
「伍佰引毋著去，村上嘛引毋著去，到底是佗位引毋著去呢？」囡仔問甲那盤喙錦。
「Beatles的歌本名是Norwegian Wood，遮的Wood，毋是樹仔林，是厝裡用來成格、裝潢的材料。落尾有人去稽考，彼嘛毋是原木或桷仔，是貼皮仔。事實是這裝潢的料身毋是正柴，是頂面有木紋的一沿皮，煞予掠做是正港的、按北歐彼規大片、直溜溜的烏樹林剉來的。原木當然較貴，貼皮仔干焦做表面，就真俗囉。」
「爸爸按呢講，Beatles歌唱的，根本就毋是樹仔林，是踮房間內底啊。」囡仔愈聽愈憢疑。
「這塊歌是咧講，春風少年兄講伊捌有一个查某囡仔，按怎講咧，彼个查某囝仔嘛捌有過我⋯⋯按呢講是真囉嗦，就是兩人有意愛啦！查某就招少年兄去伊的房間，共展講，你看，這Norwegian Wood有好看無？兩人就按呢米糕𣻸落去，嘛毋知兩人有鬥搭無？彼暗少年兄睏佇咧浴槽內底，透早起來發現彼查某出去上班矣，可比鳥仔飛無去，少年兄氣甲，強欲戛火來共這Norwegian Wood燒燒去。」
「爸爸按呢講，和樹仔林毋但差真濟，閣真笑詼咧。」
「嘿啊，藝術就是按呢，定定理解毋著、脫箠重耽去，本底就毋是這意思，看一个影，生一个囝，聽著的人或讀著的人，干焦磕著貼皮仔，就若鳥仔飛去矣，家己去發揮，去揣伊譀想的彼片烏樹林，煞和原底的房間無底代。這就是文學分析講的誤讀。」
講著較深的理論，我獅頭捎咧就直直弄（lāng），囡仔就無趣味矣，頭頕頕去讀家己的冊囉。
我早就慣勢這款的對待，徙兩跤步，共櫥仔跤冊格仔彼角的《挪威的森林》抽出來，台灣第二版五十刷，頭版的佇二十外冬前讀過，手頭這版的裝釘，頂下兩集、冊皮仔一紅一綠對對、敆做一部。
就來餾（liū）讀，讀踏話頭主角坐飛行機欲降落德國機場時，無張持聽著Beatles唱的Norwegian Wood，就來想起彼死去的幾个朋友和幾个閣活咧的朋友，就來共這青春的往事寫落來：死忠的換貼自盡，伊女朋友精神錯亂去蹛療養院，主角有佮意的人矣，煞毋知按怎和伊行做伙，這膏膏纏的關係，舞袂清的感覺，對人情世事的生疏離縫⋯⋯。
心是虛微浮冇，性是無要無緊。
規本《挪威的森林》，就是浮浮沉沉，直直咧走揣，毋知影盡尾，罩佇咧精神歪斜（uai-tshua̍h）、跤步蹁去、撇咧撇咧的無定著內底。
我就共起頭煞尾小看一下，濫糝讀⋯⋯故事的氣味會共人邪（siâ），予我無蓋四序，有寡無正常，筆路看起來弄扭弄輪、無要無緊⋯⋯便若看予入骨，就會通綴往事共彼毋甘、後悔、躊躇、空茫⋯⋯抾情抾恨來散淡去。
濫糝濫糝讀煞眼著這本冊的鋩角，共我心肝穎仔拑牢牢的這句：「死亡毋是在生（tsāi-senn）的對頭，是成做（tsiânn-tsò）在生的一部份好來存在。」
咱人通活踮這世間，是濟濟的死侹（thiānn）起來的；咱的性命有死亡來舒底，才有法度踏跤步出去。死亡就蹛佇活人內底，是咱人的一部分，有伊來做成（tsò-tsiânn），有伊予咱準鏡來照影、反省，咱才知後一步欲按怎做、按怎行，才有活落去的勇氣。
凡勢，我按呢開拆解說，嘛讀甲重耽去，嘛是一款耽讀（tânn-tha̍k）。
袂輸生死交纏，正確和錯誤濫做伙，這才是誠實（tsiânn-si̍t）的人生。小說正正共咱的人生寫出來，故事和主角和情節是假的，咱若讀有落去、感動就成真，真假交纏，是房間內的貼皮仔，嘛是北國彼闊莽莽、清冷幽靜的烏樹林，聽〈挪威的森林〉，傍傷悲和孤單來數想，心情就會一直飛，一直飛，踮夜空。