【城市浮冇】有暝無星：𤆬咱去揣告五人
烏暗寬寬仔佇天頂晾蠓罩，予天地一絲仔秋凊和恬靜。萬物就欲歇，目睭皮瞌起來，那親像這暗暝欲成的範勢。
擔頭看天，規片是烏趖趖，人的心肝頭向望有寡細粒物仔來光爍，是妝娗，是虛華，閣驚孤單無伴。
啥物都無，有暝無星，偌爾仔虛微。
咱就來走揣，走揣事物的因端，確實毋是這城都無情無目屎，嘛毋是踮路面遨無張持失去。是因為，咱是一个宇宙，看內底面的星球全化去，迷茫的心情宛然失光明，閣去予咱頭頂彼開闊無盡磅的太空崁起來，有烏暗透暝透底⋯⋯。
聽樂團「告五人」的〈夜裡無星〉，予我起譀想，頭殼神去予茫渺的樂音牽甲毋知走佗位去。有時，咱人聽音樂無為親情愛情，毋是咧開破事理，嘛毋是啥物確實的物。定定，就是一款感覺，通浸佇咧內底面，予樂音直直放，重來閣再來，按呢勻勻仔踅、踅甲真自在、就是踅佇踅的這个踅內底踅。
「告五人」主要成員是三个宜蘭少年人，鼓手哲謙拍底，男主唱潘雲安，女主唱犬青，兩人伨頭搭配。有時查埔唱，有時查某吟，或一个扞頭一个和聲，落尾來做伙唱、絞做伙。
女聲男聲樂器配樂相敆，有影是鬥搭四配。
告五人的音樂媠氣閣齊勻，旋律貫串，一流水的滑溜，本底就有真濟迷眾。這團真正會來起氣，有一个要緊的鋩角，就是引做新台劇《用九柑仔店》的配樂，彼塊歌號做〈披星戴月的想你〉，用新歌路唱思念的心悶。
較早寫歌的版路，講著思念，攏是主角守踮一位所在，望啊等啊向彼數念的人轉來，〈披星戴月的想你〉煞有一款動能，共思念準做半暝的列車，碌硞碌硞行對彼遙遠的向望、遠兜的愛人遐去，真綿爛、真拚勢，無予家己退路，就是衝出去毋管頭前路是好是䆀，有貼底無盡尾。
隨時就愛聽，隨時通起行，這款拍死無退的捙拚性，催落去向前行，真有使命感，帶命底的理所當然。準講愈離愈遠愈來愈惡，嘛是愛共天星揹咧月娘戴咧，猶原直直來衝、拚勢咧紡的思思念念。
告五人予人興甲瘋甲，毋但是伊迷茫的氣味和轉踅盤遨的旋律，閣有歌詞的詩質：雅氣，束結，極媠。主唱潘雲安的阿兄潘燕山寫的詞有影文青，躡跤尾彼款沓沓仔鋪排，〈愛在夏天〉：「他 就活在我心上 撐著一把傘 就站在我夢旁 我的頭髮 有月光的柔長 卻圈不起 一朵雲的形狀。」詩是田嬰，佇水面點泱，氣質就按呢tòo開，溫柔仔輕柔，到你的心肝穎仔拍一个結，予你無想欲敨，就予詩的氣質攝去：「我們的愛在 螢火蟲的夏天 時間 就像那盛開的睡蓮」。
就是遮爾仔好聽，可比〈帶我去過夜生活〉，聳勢，飄撇，鑠奅。告五人有規身軀全城都的時行，彼是暗暝的王國，就愛開跤行、浪蕩幌，行佇咧大路行佇咧毛斷的繁華，踮胭脂和嫣頭做主的夜，舞曲踅玲瑯，玲瑯佇咧鬧熱的人陣內底，毋歇毋睏，毋予音樂佇車河的時間之流擋恬，就是逐出去、走落去，無啥物通阻擋的，孤孤來吟：「嗚嗚嗚嗚 嗚嗚嗚嗚 嗚嗚嗚嗚⋯⋯。」
調會起起落落，趨流籠彼款順閣金滑，有畫面、有氣味、有光燦燦的暗暝，就無需要天星矣：「如果你還沒有睡 如果我還不停追 如果清醒是種罪 就把誓言帶走 換承諾不回⋯⋯。」
◎刊佇《海翁台語文學》，226期，2020年十月。
