【城市浮冇】踢球
下晡時仔，天地較涼凊矣，球mooh起來，阮就去學校耍球。
國校的運動埕，人是插插插，真濟來運動的大人，囡仔閣較濟，有阮仝校嘛有外校的，老師拍網仔球當老（láu）當熱（jia̍t）—— 驚去予㨑著去予教示，我就和小弟離較遠咧，佇運動埕另外彼頭咧耍。
踮跑道外圍箍的草埔，有一組舊漚的奕耍設施，是用鐵管燒相黏、一棧一棧搭起來的空格仔。
彼時我是賤甲毋知定著的囡仔，枝骨挑俍厚活動，軁入去鐵管的空縫，自內底跤踏手扞，一下手就peh起去矣。
坐踮鐵格仔厝上頂頭，並我懸的是後壁面的樹仔：會記得有榕仔和欖仁，上佮意的是鳳凰木，便若開花就紅冇冇褙（puè）金葉仔，風勻勻拊過，搖搖摵摵會擽（ngiau）人的心肝穎仔。猶毋過，彼色水是春天過略仔起漚鬱時才會有，鳳凰花較開較豔，嘛干焦學生囡仔欲畢業時的個外月。煞佇我相著鳳凰木彼時，準講是規欉青見見（tshenn-kìnn-kìnn）毋是開花時，我猶是會共色緻頓佇咧頂面。
袂輸阮校園彼角勢的鳳凰不管時咧開紅展金。
雙跤佇鐵格仔厝頂幌咧幌咧，看對運動埕去，草抽長長的葉仔尾閣毛毛，田嬰身軀紅赤，薄翼顫痟緊，敢若透光的麥仔色，有囡仔行倚就規陣來徙位，按呢徙來徙去橫直就是佇半天停咧，真定著袂驚惶彼款。
看較遠咧，有大人順運動埕踅箍仔咧練走，襪仔攏（láng）懸懸到跤頭趺，閣有三橛的色箍仔真顯目，是蓋時行的款式。像我這款的猴死囡仔是遮一簇、遐一簇，咧覕相揣、走相逐，嘛有咧摃球、掔球，拍籃球嘛有踢跤球。
就眼著一个較大漢的、敢若咧讀國中的人，孤手共球扞咧、開跤傱出去，手蹄仔小鬆咧球輾落，跤就大力共踢懸。
運動埕彼爿面，伊的朋友頭擔（tann）起來，金金相跤球佇閬闊的空中，牽一條媠氣的線，就欲共承起來囉。
無斟酌去相彼球是用頭去挵，或攑跤共定（tiānn），我看著的是規个運動埕，毋是正圓煞是予破爿切開，自中央接長株形的草埔，四箍輾轉予塗沙坉的跑道圍起來，一爿角閣有沙堀仔，抽一逝路予人來衝緊跳遠。
這是我細漢時的大世界，天是清kia̍t-kia̍t，鳥仔聲蔥脆袂囉唆，大人囡仔走來走去，球真自在，予人承起來，或輾入去草發甲的臭腥所在，予人那掰那揣。
走精的會閣轉來，佇外圍咧搧涼的清閒人，會去予呼（khoo）。
「喂！欲來踢球無？阮朋友有代誌轉去矣，欠人和我踢，咱做伙來耍，好無？」彼个人mooh球來招。
「我跤球較袂曉，罕咧耍。」
「無要緊啦，有跤就好，連手攏免，共球踢出去就是。」
我目睭瞭（lió）一下，看阮小弟和人摃球摃甲，毋免我囉。
「好啊！咱來耍。」
彼个人就共球抨來鐵格仔厝頂，我無承著，球可比夜市咧拍珠仔，踮格仔內底彈來彈去，我人隨溜落去，佇球猶袂落塗進前，欱起來。
「跤手閣真猛掠乎，來，我去彼爿等你共球踢過來。」伊目頭開開，踅身就彪（piu）。
佇伊猶未切過半、才到運動場的中心時，我學伊的跤步手路來踢，煞無著。
伊雙手夯拄天，佇遐咧等我啦。
閣來一遍，我傱入去埕內底，手扞咧那衝那共球放落，大大力踢出去。
球飛真懸，懸過鐵格仔厝，懸過鳳凰木，飛佇咧圓圓予長株形挩開閣鬥起來、有挖沙堀仔、田嬰飛規陣的運動埕。
佇咧我倒絞想起彼个下晡時，成作一个點。
猶感受著彼時的涼凊、聲說和天地的空茫。
就是有這款的代誌，和我人生的發展無牽磕、嘛無影響著未來，煞佇咧我記持無定無著、毋知按怎樣的時陣 ——彼粒球就飛懸，近倚，予我承起來。