【寫批予你】佇厝內孵的日子

予未來的家己：

踮未來的你凡勢無法度閣體會，甚至早就袂記得，有這款的歹時機，規家伙仔全關踮厝：囡仔無通去學校，一个用電腦怙視訊來上課，一个佇咱的冊房寫功課，按呢相替換。太太上網去攢料叫貨運送來、囤佇彼強欲囥袂落的冰箱，閣煩惱暗頓愛煮啥？規氣叫食食喊Uber Eat送便的來。

這時的我，有寡鬱卒，定定掛煩，有當時仔閣感覺袂䆀，通守踮厝裡寫作，和某囝鬥陣，寶惜這罕得的時日。囡仔緊慢會大漢，會離厝出外拍拚，按呢規家伙仔守厝鬥陣的好時日，我真寶惜。

煞毋知，通世界去予肺炎𧿬踏，人類為這世紀大災滾絞甲，逐工致病、冤枉死的數字直直添、硞硞衝起去，一日過一日，到今冬外矣，濟甲予人失神魂，落尾tsua̋nn麻痺去。

台灣佇病毒拄夯起來的時，跤手猛掠共硬擋，無予瀳倚來，就有一站仔全世界受苦、咱台灣島安穩四常的日子。無疑悟，病毒是遐爾仔狡怪，一下失覺察，就偷偷仔軁入來、暗中湠開。咱嘛傷過靠勢、放冗去，等病毒歹枷枷濆出來的時，一工幾百个幾百个掠人來「交替」，政府袂赴擋、揤袂落去，病人濟甲病院收袂赴，民眾驚驚惶惶去搶物資，網路頂有人鼓勵，閣較濟是詈掛撟、亂亂話、風聲謠言滿天飛。

無到一禮拜，就宣布三級警戒。出去定著愛掛喙罨，餐廳干焦通包轉去，公用場所全無開放，囡仔踮厝上課讀冊，公車捷運鐵路高鐵罕人坐，路頭的人和車少甲袂輸空城。若無必要，準是人上好就共家己關踮厝裡，門徛一步都莫踏出去，按呢一工、三工、一禮拜，禮拜閣禮拜，月日過月日。

台灣人掠做毋免像全世界按呢關禁，會當踮家己的島內天地，逍遙自在；想袂到猶是無法度，跤步踏縒，猶是著和全世界度相siāng的天年。

嘛毋知著關偌久？踮這時逐家都咧向望疫苗緊來緊緊來注好好，會當轉去較早彼正範的日子。猶毋過，這關禁的日子煞勻勻仔成做四常，到尾，凡勢就毋知彼正常的日子欲按怎來過囉。

未來的你啊！我家己，收著這張批時，敢會笑出來，那讀那踅踅唸這曷無啥⋯⋯逐家攏過慮囉，這COVID-19成做歷史囉，今寫佇教科書內底，連電視台欲餾做專題，嘛無人看。彼工，有人感著這病毒，煞予人起笑：「這款阿婆仔病閣佇咧喔！」就當做挖著考古遺址貼網路來展。

當然無希望你收著這張批時，目頭結起來，心頭搐，心悶去予病毒掠交替的親情朋友。

莫，上好莫，莫有任何的手痕，佇我的心頭做為記。

猶原是普通時仔的透早，囡仔本底愛去學校讀册，太太環保橐仔捾咧就去菜市仔，我不時會去行踏稽考、和人參詳代誌。現此時，全收倒轉來，束佇咧厝裡，佇狹櫼的小所在來孵。

踮厝裡的巷路按呢行來行去，看對窗仔外彼欉鳥榕去，頭頕頕咧愖，某囝佇仝所在咧無閒in的，我煞感覺恬靜，心肝頭來坐清，外口的街仔路嘛是恬的，規个城市全台灣和通世界嘛恬恬摻落。

我佇厝裡按呢來步輦，傍窗外的景緻那親像我今佇咧peh山，去予樹仔林和茂茂的青翠捲起來，鳥仔喙尖尖共鳥仔聲咬破啾啾叫，山雺是縖巾略略仔幔咧，我人踮深山開跤行路，欶鮮沢的空氣，自由自在無束縛。

未來的我家己啊！毋知你來讀我這批內底的心情，是會笑？會溫燒？會傷心？無要無緊？

敢講你會寄望轉來我這時，轉來到這揜貼、單純、清氣相的日子，免出外走傱、袂予代誌觸纏，通共齷齪和鬱卒全收踮厝內，勻勻仔孵，在穩來過日子。