【布袋戲小說】贏的人啥物都無

這篇布袋戲小說，寫的是江湖的恩怨和對搩，講的是網路科技的走精和滾絞。踮2021年正月、第61期的《台文戰線》季刊發表。

〈角色〉

桫欏（Sa-lô）

曼陀（Bān-tô）

垂枝（Suî-ki）

毛禾（moo-hô）

〈開場詩〉

孤獨是一匹衰老的獸

潛伏在我亂石磊磊的心裏

— — 楊牧

〈故事〉

桫欏定定想起彼改決死的相戰，彼个山塌，四箍圍仔全石頭，號做「石頭塌」。

彼時，伊和曼陀已經戰兩个暝日矣，都戰甲無力猶閣愛佯力出來，伊毋知是按怎弓落去的。

想起彼上尾的結局，若親像佇桫欏目睭前重搬。

伊目睭看著的，是曼陀共伊的劍揤低，佇石頭面砉，砉甲出火金星。

曼陀跤步伐緊，就來拍箍踅。

當當時，桫欏是佇咧石頭塌的上下底，曼陀跤步掠緊，佇伊的四爿面走，愈走愈緊，袂輸捲螺仔旋。仝時間，劍去摖石出的火金星，愈來愈光，愈來愈炎，並曼陀痟緊的跤步閣較痟狂，爍爍顫。

「石頭塌」袂輸咧放煙火。

桫欏發覺著，這是曼陀的欺敵步，欲予伊目睭花去，趁機會來出手。

桫欏就共目睭瞌起來，用耳仔來聽，認彼劍和石頭相挨的聲，就知影曼陀伊人佇佗位矣。

欲趁曼陀跤步放軟的時陣，一招予死。

記持倒絞到遮，桫欏轉來到現此時，手去摸正手爿的面，是猶聽有，毋過，耳仔唇無去矣。

●

桫欏犧牲一塊耳仔唇，來取曼陀的性命，伊感覺真會和。

是按怎共曼陀刣死的，佇桫欏的記持內底，煞有兩齣戲。

彼當時戰甲全然無膏，毋但耳仔，規个身軀大空細裂。確定曼陀無咧喘氣矣，伊就死死昏昏去，跋入眠夢內底。

等伊去予救起來，人較清醒矣，煞分袂清：

佗一齣是事實？佗一齣是眠夢？

較成事實的過程是：聽著曼陀劍斷去的聲，趁這好機會，伊人飛起來隨揬出去，目睭皮嘛擘開，火金星差不多攏散去矣，賰寡烏焦烌。曼陀看著伊傱來，驚惶甲，兇兇狂狂共斷劍捽出去，伊隨坦敧身煞袂赴，耳仔唇去予削掉。

猶無感覺疼猶無時間想遐濟，手頭的劍就對曼陀的心臟正正插落去。

這敢若較成一場對搩的上落尾，猶毋過啊！曼陀遐狡怪，解決伊敢有通遐輕可？

較成眠夢的過程是：劍摖石頭面的聲，響袂停，佇伊的四周圍遨，毋知欲遨甲當時？就佇桫欏心頭起憢疑的時陣，伊感覺空氣中有物件逼倚來，彼是人的身軀，的確是曼陀本人，毋過，彼劍摖石的聲猶咧響。

有一支長長的物仔揬倚來，伊目睭那擘那閃，正爿的耳仔唇就予割落來矣。仝時間，為欲保護家己，伊攑劍紡一个大車輪，這招號做「吸積盤仔」，可比烏空共所有近倚的性命全吸倚來，用彼劍光共所有一切的性命絞絞掉。

掠準曼陀就是按呢予結束性命的。

這招劍法傷家己較贏傷對敵，出招了後，伊氣力毋但焦去，閣倒咬，人就來躄倒，毋知影人矣。

●

桫欏和曼陀會來決死戰，毋是in兩人的冤仇，是因為垂枝和毛禾咧起交繃。

垂枝佇深山林內修練功夫，真久真久矣，伊共家己關踮山洞內底，是欲來共孤獨（koo-to̍k）的底蒂，斟酌予透流。

有一工，某乜劍客毋知按怎揣的，去到彼揜貼的所在，問垂枝：

孤獨到底是啥物？

垂枝干焦應一句。

劍客落山，轉來江湖，就風聲講：

垂枝揣著孤獨真正的底蒂矣。

煞來起風波。

這句話毋知按怎盤的，盤到仝款佇內山斗底咧稽考孤獨的毛禾遐去。

毋知閣是佗一个劍客去拜訪的，或者根本無這代誌，話煞來盤來盤去，講毛禾才是真正徹理，垂枝揣著的，毋是孤獨（koo-to̍k），是孤獨（koo-ta̍k）。

就按呢，江湖就有劍客咧共垂枝譬相，講伊是孤khu̍t、孤老，就是各馝啦，哪是啥物孤獨（koo-to̍k）咧！

想欲共這話講予垂枝聽，煞揣無伊修練的山洞；欲去問毛禾，伊人佇佗閣無人知咧。

功湖就為著 koo-to̍k和koo-ta̍k咧起冤家。

垂枝以早教過的徒弟徛伊這爿，毛禾的徒弟仔當然嘛為伊，兩派的弟子就佇功湖咧唱聲，講in這爿才是正港的koo-to̍k，對方攏是koo-ta̍k啦！

風聲佇江湖咧話來話去，鑿來鑿去，罵來罵去，就按呢來起戰事。

「覕佇內山毋是koo-to̍k，踮齷齪的人世修練koo-to̍k，才是正港的孤獨。」

「垂枝人歹鬥陣，伊的劍館才會散了了，伊是孤khu̍t啦。伊人就老矣，去內山等死，有影是孤老。」

「毛禾就是毋捌koo-to̍k，才會來去譬相垂枝。你想看覓，正港踮佇咧koo-to̍k的人，干焦欲共家己的心看予真，敢會去管別人是koo-to̍k或者是koo-ta̍k，伊彼假的啦。」

「koo-to̍k的koo-ta̍k有啥物無仝？」

「koo-to̍k是珍珠，koo-ta̍k是假包。」

「通浸佇咧家己一个人的內底面，才是koo-to̍k；姑不而將才來一个人，彼是koo-ta̍k。」

「好的是koo-to̍k，䆀的是koo-ta̍k。」

「koo-ta̍k就是寂寞，閣真需要別人咧，是一款關係的不滿足。」

「因為伊無法度和人鬥陣，才會來驚koo-to̍k，其實，伊是koo-ta̍k。」

「因為koo-to̍k捌袂透，才會來驚koo-to̍k，走去koo-ta̍k遐，予koo-ta̍k掜牢牢。」

「按呢，孤獨到底是啥物？ 」

「敢講，孤獨是一招劍法？」

「孤獨通來刣野獸。」

「孤獨是獸？」

「孤獨是獸。」

●

見若江湖有代誌無法度解決的，神劍大天神就來跋骰仔。

咱攏知，骰仔有六个面，大天神跋著的彼面，就予彼面的劍客來捙拚對搩。

閣莫講這改的「垂枝毛禾事件」，為著孤獨是啥物，啥才是正港的koo-to̍k，兩爿的徒弟仔放刁唱聲，看鬧熱的人嘛沖沖滾。

按怎面對孤獨，是人人攏會拄著的代誌，到落尾，連看鬧熱鬥出主意的人嘛蹽落去，兩陣兩派攏有夠大篷，煞來絞做伙大捙拚。

這代誌鬧甲無法度收煞，神劍大天神就來出面，跋骰仔來決死戰，煞來跋著後壁面才蹽落來的桫欏和曼陀。

●

拄開始是踮「稀情石山」這山崙仔咧拚劍術，拚兩暝日兩人纏做伙，輾落去「石頭塌」的上下底，才有輸贏出來。

桫欏贏矣，伊這馬代表正港的koo-to̍k，毋是假包的koo-ta̍k，伊為垂枝出一口氣，拍贏這場戰爭。

伊用頭巾仔共鬢角包起來，按呢就無人知影伊耳仔欠一塊，耳仔肉毋知落佇咧佗一位的石頭縫，欲揣恐驚爛去矣嘛接袂起來。

伊共骰仔還予神劍大天神，就欲來回轉。

「佇遮宣布，桫欏你贏矣。」

「多謝，我為孤獨正名矣。」

桫欏共劍揹踮肩胛頭，越頭欲來走⋯⋯耳仔煞聽著劍去砉石頭的聲。

哈哈，曼陀，你死矣，這聲你真真正正揣著孤獨矣。

桫欏目睭瞌起來，看著四面八方的火金星，可比華彩燦爛的煙火，袂輸咧慶祝伊的勝利。

●

桫欏目睭閣褫開，頭前面是平靜的水波。伊人佇棑仔頭，等撐渡的過來，共伊載向對岸去。

和水面仝款，伊的心頭恬靜無痕，煞有聲浮出來：

「將其尾予你贏矣，請問，你有得著啥物？」

「你為垂枝出聲，走來相戰，伊敢知影這代誌？」

「失去耳仔，得著勝利，和你到底有啥物底代？」

「你是為著一个『名號』咧拚輸贏，koo-to̍k暫時歸垂枝，毋是歸你啊！」

「你也毋是垂枝的徒弟仔，你是欲替in出聲，為著koo-to̍k的名號咧捙拚。」

「你戰贏矣，桫欏你敢有得著啥物？為賭一口氣踮意念的戰場捙拚，拍贏矣，按呢是欲閣按怎？」

「敢確定你有和曼陀決死戰？或者這是一場陷眠，共耳仔削落來的，是你家己。」

桫欏的心坐清了後，才發現，捙拚甲連性命都欲無去，上落尾，干焦是予這齣戲來完成爾爾。

勝利的人啥都無提著，提著的是名號，是浮冇的虛名。

撐渡伯仔共船划倚，靠岸時硞一下出聲，喙就來唸：

桫欏曼陀，垂枝毛禾；意氣水波，風起隨無。