【散文好記】按紅花坂來

暗頓煞，和查某囝同齊看《按紅花坂來》，故事是無鹹無纖，袂激，看到上尾，煞浮一款清芳的氣味出來。

這齣尪仔影戲（動畫），共1964東京奧運舉辦進前，彼日本國的起氣和青春的向望，畫甲不止仔媠。若咧坐車遊賞彼海墘的山崙仔，崎勻仔peh是勻仔出景，閣通看著開闊聳氣的大海，有影是心爽樂暢。

故事主腳（tsú-kioh）是姿娘仔小海，逐工透早起來就縋旗來紀念海戰中過往的阿爸；讀高二的伊，和社團的學兄互相有意愛，煞發現袂當愛；學校按算共舊漚舊臭的社團大樓敲掉，學生綿爛走傱欲共歷史掜落來，就共摒掃清氣，欲予這个傳統繼續傳（thn̂g）落去。

宮崎駿筆仔尾共彼纓纓媠的人情世事、建築景緻畫甲袂輸光批。

時間沓沓仔行，感情勻勻仔放，終其尾唱做一首清遠、心悶、閬曠的歌。

コクリコ坂から，華語《來自紅花坂〉。

和查某囝是看甲真綿精，那賞那教伊愛情的鋩角：按怎去掠人的意思，䀐曖昧，吐真情，節告白的時機⋯⋯上要緊的是，若決欲和彼查埔囡仔做伙，定著愛伊共爸爸的作品全讀過，暗念鄭順聰的詩。

查埔囝隨反白睚：「好好仔看片啦，爸爸莫來亂。」

這時，我就共攬落去：「告白若成功，就愛按呢抱。」

「若像爸爸遮gâu亂遮囉嗦，我才無欲和彼个人做伙咧！」

「橫直就愛交爸爸這款形的。」

「你無看彼校長予散形的學生拍敗，蓋無奈的面腔。」

「遐的學生毋就見天、見天。」

「阮的心情就是按呢生啦啊！」