【讀讀好書】世界闊閬閬，咱勻勻仔開破
做雞卵糕的手路百百款，你敢有食過「飯」做的？
這本散文集的81頁、十一月天涼冷，作者妍音有寫著，佇伊兩个囡仔猶細漢時，厝裡罕咧食外口的物仔，驚有加工、做手、無天然，就攏家己煮。連囡仔做生日，嘛毋是去麭店買師傅烘出來的，這个頂真綿爛的老母，無濫麵粉、牛奶和糖，干焦是用一款特殊的手路和飯，就來做彼外形像「雞卵糕」的生日禮物。
而且，兩个囡仔真捀場，生日若倚，就吵欲食媽媽做的「飯的雞卵糕」。
這毋但是媽媽的愛心，嘛是作者妍音的巧路，用溫燒的字句，滿滿的愛，為台語散文牽一條綿綿長長的路。
《海，拍開咱的眼界》，是用第二人稱的形式，老母寫批予囡仔的聲說，按一年十二月日，起頭煞尾踮五月，自落袂停的雨到天清清，攏總十三章，敆做一本燒烙烙的好冊。
人生若是一本大冊，愛用心去觀覽。
妍音就是抱著按呢的關懷，輕聲細說參囡仔開拆人生的義理，節氣的變化，人的成長 — — 閣有伊蹛的高雄，大海彼款展開港都的氣魄。
母仔囝的關係，定定是真觸纏，有的老母踅踅唸，歹枷枷來教示，甚止怙詈（lé）的⋯⋯這是古早台灣社會環境困苦，姑不將才會來按呢。毋過，這馬台灣的教育較好勢矣，親子關係佇咧轉（tńg），轉向閣較幼路、齊全、現代的晟（tshiânn）和教（kà）。
環境和關係改變，語言嘛著愛轉（tsuán），轉變方向、改變氣口、飽滇內涵，妍音這本《海，拍開咱的眼界》，就是咱台語教育的新氣口、新聲說。伊毋是徛佇一个做娘嬭的範勢，愛囡仔按怎聽按怎做⋯⋯伊知影，囡仔是獨立的個體，是有思想的靈魂，母仔囝之間，就愛互相，袂輸朋友咧開講，若有對同，上好；假使扴膏，就來開破（khui-phuà）。
著啦！「開破」這兩字予台語的「媠氣」全然拍開！共事理拍開！勻勻仔破開內底的鋩角，予你了解、予你認同、予你順咧來做。這毋是硬拗硬逼的，是掠著你的心肝頭，予你佇智識上來認捌、感情上來意愛，這就是開破，這就是妍音做一个媽媽老師所寫的文字予人感心的所在。
台語散文這幾冬愈來愈旺市，大腳的有廖玉蕙、劉靜娟蹽落去，閣有猶未出冊的王昭華。妍音進前出版《湖，咱的活水》，我捌佇教育廣播電台的節目「拍破台語顛倒勇」共訪問，感受著伊文字和聲音的溫柔幼秀。
彼時，我就大大主意，台語散文的創作，該當愛出濟濟妍音這款作者，文字樸實，感情飽滇，朋友彼款用台文和你談天說地，講生活，說人生。妍音的文學，予人放輕鬆，感覺貼心四序，可比媽媽輕輕仔攬咧，所有的憂愁攏佇伊溫柔的言語內底，走無去。
現此時，就共「飯的雞卵糕」捀出來，這毋是正範的、市面上用麵粉做的雞卵糕，是妍音用伊自序大和親情學的台語，和華語的文學拍底，摻伊家己的體會和思考，變竅來做出來的「雞卵糕」。這毋是啥物師傅的大菜，無鹹無纖，煞通予家己人和有對同的人，寬寬來啖，好禮仔來嘗。
按《湖，咱的活水》到《海，拍開咱的眼界》，妍音共台文的水（suí）楦闊，是硞硞流的活靈靈，嘛是徛佇海墘仔眼著的闊閬閬世界。
這全成做妍音的文學，綿綿鬆鬆，對世間萬事萬物含帶深意深情，咱著歡喜來讀，字字句句，久久長長。
