⭔佇京都無想啥
Jul 29, 2024
到關西地區遊覽，若毋是專工去，我會撥一、兩工溜去京都蹓蹓咧。
京都的廟寺，就像府城的巷仔，是踅都踅袂了，看都看袂透，仝箍圍仔都去過遐濟擺矣，見若行入去，攏會有新的發現。
來府城軁巷仔，是欲拄著觀光冊無寫著的點心和好料；去京都踏廟，有麗倒古範的大殿和大欉樹，較入我心肝窟仔的，是覕佇跤路盤踅的上內底、有簾簷和緣側框起來的園仔。
龍安寺的枯山水和天龍寺的太出名，搵豆油的人是洘洘洘，濫濫雜雜予生本的清幽洘去。我較愛烏白行、隨意看，眼著一間廟寺閣並古早，無遐出名，就拆票去內底行行看看咧。行入去才知，毋但是建築有歷史和故事，閣暗崁一座園仔，簾簷跤緣側頂無啥人坐。
我就坐落來，予痠疼的跤腿小冗一下，心綴咧坐清，勻勻仔拍派紲落來的旅程，踅神，或者是共簿仔掀開，寫詩。
像智積院的園仔有一口池，我無聊去相閒閒罔泅的鯉魚，雄雄若想著啥，攑頭和夯起來的半爿山崙對相，石頭和樹欉一丸一丸，像佛祖頭。
或者是東市的講堂和金堂都參佛過，共日本現存上懸的木造五重塔擔頭看久、像gàn錢彼款箍一輾過矣，順紲去東寺後壁路門票兼賣的觀智院來觀看覓，有枯山水喔，石頭仔面順順耙直巡，中央有小島發旺欉，烏瓦素牆是白噪音，飛過的鳥仔是畫外音 — — 論真講，有影是無啥貨，顛倒是劍豪宮本武藏親筆的障壁畫，予人好玄驚嘆。
無啥物人來，心就袂齪，我坐佇緣側看久，無看著啥嘛無想啥。
通予我無咧想啥，無想欲做啥，干焦坐甲久久。
踅來京都的這日，按呢就夠矣。
