⭔分離和離經：今仔日的天氣蓋法國

今仔騎跤踏車出門，佇巷仔口拄著共拍鐵仔褲穿甲櫳櫳櫳的查埔人，長皮包仔插佇後褲袋，欲死盪幌，敢若欲輾出來矣。

我佇後壁替伊煩惱，查埔人無攬無拈做伊行，自巷仔口斡對大條路去，按呢的穿插和範勢，親像咧展標撇，荏懶嘛是一款私帶鑢（style)。

我想我是想傷濟矣，凡勢伊逐工都這號形，長皮包仔毋捌拍無去，嘛無人敢去剪。

顧咧去想彼箍荏懶，煞無去張持現此時的天氣，跤踏車來到天橋跤，風剾過來若共我托頭，攑頭看著路樹和清鏡鏡的天，哇！風颱拄過共空氣中的坱埃腌臢洗汰甲離離，天地清和甲，心內忍不住按呢咻：

今仔日的天氣蓋法國。

行過公園邊，樹仔是閣較旺欉，對面來仝和我騎跤踏車的囡仔大人，面容仝遐輕鬆樂暢，今仔日有影好天，人人心情齊輕鬆。

是講，咧等青紅燈時，我翻倒頭來想：按呢的好天是現現佇頭前面和身軀邊，是按怎我會想對法國去？閣蓋成南法的Provence，我捌佇遐𨑨迌幾工仔，確實就是按呢的聳勢日頭、紺色天頂，予人不止仔身爽。

今我徛的所在都有矣，是按怎心情踮歡喜，頭殼想對別位去？

來到恬靜有氣質的清幽地，咱會掠日本來比喻；若是曠闊看無盡磅的大草洋，見想就想著歐洲的歷史大地；熱情的海岸、激場的板嘹，拉丁美洲才合味。

「今仔日的天頂蓋希臘」，論真講，遮的所在我毋是齊去過，煞掠來比喻現此時的情境和心情，袂輸人現現就佇遐。

閣較離經的是，嘛毋是踮城市才按呢想，佇庄跤或四常的街市，便若看著媠景緻，毋管眼看身蹛的現此時是按怎，頭殼一下仔就會飛去別位，和無啥熟似甚至無去過的外國光景牽連做伙。

毋但是我，濟濟人無論蹛佗位啥背景，和我攏有仝款的比喻和空想：較早是自冊內底，廣播放送，信用合作社送的曆日來取；古早人順神仙故事、傳說講古來剪黏；現代人有看袂完的影音、收袂了的資訊，閣有人是正港過鹹水逐所在都行跤到親目睭看過身軀體驗過。

目睭看佇粿，跤踏著火；目睭一下過，空想就來飛。

這是咱人自本就有的症頭，對面頭前媠甲無比止的景色，激動過頭，無法度勻勻仔來賞來觀來啖，這是人生成的本能，會用便的聯想和比喻來褒嗦今仔拄著的感動，有彼號shock，無彼號言詞通入，隨湧去別位去，按怎就無法度共彼驚嘆掜起來，tsua̋nn愈飛愈窵遠。

網路時代和早當時無仝的是，所看的所聽的知影的太濟太濟，咧比喻彼款感動的時陣，通揀通掠的媠景和地標太濟太濟，身軀所蹛的和頭殼所想的愈差愈遠，愈來愈離經。

知影濟濟無的確會較好，心神走傷遠煞飛袂轉來，閣愛無閒攑手機仔招人做伙翕，咱對現現看著的媠和感動，無法度規心，捎無摠，不接一。

想到遮，想講手機仔翕兩張就好，跤踏車停落，好聊仔來浸佇清鏡鏡紺色天下跤這燒烙風共樹葉仔挲過的四序內底。

人猶是想對法國去。（是有偌興！

公園的外圍安花台，徛一對男女，雙雙揹gì-tà，面憂面結，毋知咧參詳啥 — — 是講in樂器攑起來、音樂奏落去，是欲予聽眾傍樂音送心情飛去遠遠的美妙地，就像我享受這好時好日宛然人現現就佇法國的優美風景內底。

Gì-tà男女看袂著眼前的景，無通享受好天牽抾的媠。

身軀和心魂，阮仝款拆分離，煞有無仝的離經。