【台北百萬遍（三）】烏陰風吹
唸讀佇遮
一
連紲落兩禮拜的冷雨，台北的天頂袂輸鐵枋，硩踮心情的肩胛頭，淺拖仔強欲擔袂起來矣。
伊敲電話喊伊的好朋友，風吹--ê，駛車載伊離開這个烏陰澹漉的都市。
快車落南，行踮高速公路，風吹--ê的技術實在一流，掠過這台、剪過彼隻，車phe甲真扭掠。
就是欲離開台北。
二
拄起頭，山擋踮面頭前，車就軁對磅空去，軁過一空閣一空。
來到都市的邊仔角，人講郊區的所在，大樓若竹仔插懸懸，閣有一排一排的販厝，透天的別莊咬山坪⋯⋯交流道來相接，嘛共車輛牽起來。
這條路就來擋車。
檔仔小hân一下，窗外的景緻就勻勻來行。
淺拖仔去看崎仔的菅芒，白茫茫，隨風寬寬仔咧搖。
三
快車載淺拖仔離開台北，愈駛愈緊，愈離愈遠。
路途行一睏仔，猶原是貼烏陰，天頂彼塊鐵枋毋知是欲落雨的烏雲？或者是雲積甲傷厚紲來落重色？
風吹--ê才無咧插遐濟，橫直，油門催咧就衝，欲衝破頭前彼塊鐵枋。
淺拖仔共音響捘開，人放予懶屍，雙手夯起來予頭架佇咧相扯的指頭仔頂，綴旋律來唱陳昇的歌〈風箏〉：
我是一隻愛耍閣自由的風吹，逐工予你掛心煩惱⋯⋯
四
歌唱咧唱咧，天煞來開一縫，有光旋入來。
風吹--ê看著隨講：「淺拖仔你看，咱車愈行天開愈大縫⋯⋯你看，咱倒手爿的雲破去矣⋯⋯台北遐歹天，我毋知偌久無看著天清清矣啦！」
看著天開開，淺拖仔的心情嘛拍開，伊頭圇出去，共面前的光景看予斟酌。
雲，可比一塊裂破的布，勻勻仔搝去，一絲一絲、一條一條，毋甘離開。
日頭去予閘咧，按後壁炤，旋去的光若愛耍的囡仔，佇雲去予裂去的布尾遐𨑨迌、跤溜，染一款笑黃、粉紅濫摻變化的柑仔色。
五
猶未共台北紮來的烏陰澹漉抨掉，風吹-- ê共油門催盡磅。
淺拖仔眼著，天愈來愈開，雲退去邊仔，零星零星，和下跤面愈來愈低、成做汫色線條的山陵愈來愈成。
敢若對同矣對同。
就佇這个時陣，雲內底發一粒白光，孵卵彼款，日頭就欲出來矣。
淺拖仔精神隨來，等待雲破日出的時陣。
車就來入磅空，一陣烏暗和關禁的車聲。
車隨時出磅空，佇雲內底孵白光的日頭，就欲出來矣。
車閣來入磅空。
車隨時出磅空。
日頭按雲內底躘出來，大自由。
光真鑿目，淺拖仔用手去閘，煞看著頭前的車反射日頭光，一台車揹一粒日頭。
高速公路頂面，有幾十粒的日頭咧行。
六
台北的烏陰就予淺拖仔擲㧒捔矣。
雲消退，天開開開，日頭統治一切。
淺拖仔就看著遠兜的山，遐爾清，遐爾明。
一陵一陵，一鉼一鉼，一重一重，重重疊疊。
◎原發表佇方格子， 2017/12/21。