【城市浮冇】佇磅空內面

猶未入去雪山磅空，身軀邊的人就睏去矣。

下早仔這時，天當清，日頭光共山照甲青錦錦。踮內山的內面駛車，速度是真緊，煞起一款穩觸的心情，軁磅空入去。

規个氣氛就來變換，紲落來的12.9公里，就愛維持仝款的心情、仝款的穩觸。身軀邊的人睏閣較落眠矣，我的雙眼金金相頭前面直直溜倚來的電火，路牌和標語不時共你點揬，講這段路帶真濟規矩，莫過頭緊嘛毋通傷慢，定著照起工來行。

我煞有一款坐電車的錯想，袂輸和仝磅空的人坐仝幫，車箱長十幾公里，敆做伙，有个欲挨著矣隨撨較遠去，閬傷冗的就愛促倚來 ——電車內的人恬恬咧看家己的手機仔，轎仔車內底的音樂、開講、心思無仝，攏行仝一條路、向仝一个方向，出磅空，就行對無仝的終尾去。

佇磅空內面，短短的時間，我真享受人去予關佇咧內底、浸踮家己的世界：想講咖啡無啉，敢袂起愛睏？欲去的所在是真輕鬆，時間無遐逼，就免趕；昨昏破紀錄走標十二公里，真樂暢⋯⋯。

磅空頂頭的山尾溜，光景當媠，我駛車軁過山腹，心內颺颺飛的，是各種數想、譀想、枵想、土想、烏白想、亂使想。

浸佇咧內面，無想欲出去。

有一絲仔動靜啊，我正手伸出去，去浞跤腿的內底肉。

盡尾的景緻我真熟似，先共遮光枋放落來，較袂鑿目。

磅空外彼日頭照山的光影影的景緻就對我瀳瀳過來矣。

◎刊佇《海翁台語文學》，223期，2020年七月。