【城市浮冇】冇談圍城

料袂準咱的後一步，會拄著啥？

今仔日市草真交易（ka-ia̍h），定定去的咖啡廳，敢有我的位？

猶原，先去彼間三角窗册店，略略仔踅踅咧，會和佗一本書相𤆬走？

無想欲拄著熟似的人，嘛無想欲講話，就共喙罨掛咧，假影和遮的街仔路生份（窮實是蹓成百改矣）。

好玄彼三跤步一坎的超商，人排列甲落落長，是欲買啥貨？敢若毋是喙罨嘛毋是福氣袋仔，是怎樣稀罕的物仔，予人了時間佮冷風來打（tánn）？

日頭光牢佇咧紅磚仔鞏起來的山牆，彼色水，袂輸膨皮的柑仔？膨疱的跤底？

咱人的張等，落尾敢誠實會成？

煩惱是加的，好佳哉，咖啡廳有位，無蓋理想爾爾。邊仔角倚窗的所在，予開講、拑筆電的人客佔去。

挑俍的二樓正中央有閒仔位，予我一个人來坐，煞予四箍圍仔無閒話仙的人圍城。

四面八方的冇談。

尻脊後的查某人有歲矣，老歲仔目和囡仔的教育當煩惱；正手爿彼桌開拆齒杯和齒抿和齒膏的好䆀；𤆬囡仔來的家庭無咧耍手機仔，用衞生紙搵清水做實驗；正面頭前的阿啄仔共烏仁目鏡掛起來，妝娗伊背景的窗仔子井字款，頂下挩，並伊躼。

錢是數字的對敵⋯⋯花菜是甜的⋯⋯定著愛點胭脂⋯⋯對！對！對！

免掛耳機，我的耳孔鬼仔就櫼無路矣。

才發見，拄才仔佇街仔路彼心肝頭的無定著、憢疑、掛念，全落坐（lo̍h-tsē）矣。

世俗的話語和心槽糟滓，吐空杯仔內；咖啡捧來先鼻香，毋免等落喉。

◎刊佇《海翁台語文學》，221期，2020年五月。

★新詞說明

落坐（lo̍h-tsē）：作者對華語引入來的新創詞，仝漢字台語原底有：

落坐（làu-tshe̍h）：大而化之 ，散漫， 漫不經心，邋遢 。

落坐（lo̍h-tshē）：式微，沒落，走下坡，衰敗 ，潦倒。

頓落坐（ tǹg-lak-tsē）：跌屁股。