【城市浮冇】字詞變空：過去的往過

咱若來共文字變空，舞予伊亂亂踅，袂輸KTV的水晶球仔，會有啥物款的齣頭呢？

先來烏白鬥，若親像：我的往過毋是你的往過，你的過去嘛毋是我的過去；過去都過去矣，過去就是過去的往過；往過若過去矣，咱欲按怎過去咱的往過呢？

按呢共文字變空變榫，定著會氣身惱命，讀者你嘛會若像去遊樂園坐咖啡杯仔彼款，予遨甲楞捙捙。

就來較正經咧，用鏡來照：過去的過去有去過，去過的過去是往過，往過的過去煞來過往，過往了後就無過去矣⋯⋯。

按呢來讀，閣較楞，可比電梯兩爿堵雙掛鏡，踮鏡內底看著家己佇鏡的內底閣佇內底有我，直直重了重到對面的鏡彼頭，猶原是鏡內底有我佇鏡內底是我踮鏡中⋯⋯。

好啊！好啊！按呢會舞袂清誰是誰，按呢倒反閣反倒轉來，我佇內底啊彼內底閣有我，按呢相連紲是無了時囉。

就予較櫳咧，毋才會清明。

是哩，咱就來到過去，來了解彼過去的彼咧彼咧，是到底有彼號過去矣抑是無。是咧講咱若講著往過，毋知影彼到底有發生啥物代，煞來予往過成做一層過去的代誌。是啊是會當按呢來講，往過就是彼毋沓毋屑的過去一點一點來做成的，這就是往過和過去彼款已經過去矣的關係。

是講這嘛有影非常確實是有夠囉唆的文字啦喔諾。

踮文字內底觸纏，是無通徹理彼無閣佇咧的時間。

張持彼往過的時日，就愛來斟酌，咱踮現此時來倒絞，來回想彼捌佇咧咱身軀經過、看袂著煞直直佇咧掣流的時間之溪。時間是手銃的囡仔，咱掠袂牢，干焦會當看顧，用一雙愛惜的目睭，金金看伊佇這个無張無持煞存在的空間內底嚓嚓趒，四界走挵。囡仔都離手矣，就隨伊去，過去就收踮心肝頭來當做一條摺甲好勢好勢的手巾仔，不時共展開斟酌看頂面的花草和拗痕。有記持，有拉圇仔燒的殘溫，予咱好好仔來焐、來kheh燒，通按呢來對待往過，予過去的過去有一款活跳的形。若親像囡仔，伊袂閣轉來矣，已經大漢矣、過去矣，煞佇咱對過去的張持內底，予過去掜（tau）佇咧毋捌過去的記持中。

咱愛知影，文字就是空間，毋但佔一格的額。準做是時間按呢予行，伊就死矣。

咱愛知影，文字就是時間，毋但佔一秒的額。準做是空間按呢排列，伊就死矣。

文字是咱欲來佔的所在，是咱欲來逐的未來，就佇伊成形的時陣，伊就過去矣，伊就是往過，文字就過往，伊就死矣。

就因為文字是死，伊共記持貯佇咧內面，咱才有彼時間和空間，予彼死的外形內底，有活咧的記持直直咧振動。

過去無過去，伊佇咧過去的往過內面，咱共記持斟酌看。往過的過去無過去，因為記持，因為咱斟酌。

◎刊佇《海翁台語文學》229期，2021年正月。