【城市浮冇】寫批予你

自早時精神了後，我就想欲去公園行勻。

規暗透風落雨，日頭閣無去矣，氣溫跋跋落來，這款的烏寒天，覕佇咧厝裡焐燒是較好勢。煞毋知，為欲冗早擋寒，昨暗的委士記（Whisky）啉甲傷厚傷濟，透早起來，醉意退無離，肩胛頭煞硬掙硬掙。

想講按呢毋著，人橐蹌橐蹌（lok-sōng），定著愛去外口行行咧，共酒氣消散消散一下。

下早仔就共彼累累碎碎、毋沓毋屑的代誌小清清咧，中晝太太簡單𤉙糜，就欲來出去。

就佇這時，我煞心悶著你，掛念著你，想欲寫批予你。

問太太，以早敢有定定和人通批。

愖一下，伊講讀大學彼時，寫批予伊的姊妹仔伴寫甲興甲，這馬猶不時咧連絡，後禮拜閣欲招食飯。

這我知，伊彼姊妹仔冊讀甲蓋懸，翁婿嘛真好額，𠢕甲和人股株，蹛佇咧台北的好額人箍仔，干焦後生孤一个，煞為著管教的問題，和大家官有扴礙（ke̍h-ngāi），伊都遐無閒矣，閣予憢疑偷咬雞，怨欲離緣。

太太鑿著血母：大家官家伙遐濟，煞毋放予序細，遐才是厭氣⋯⋯。

講到一半我就來出去，衫當然穿予燒燒，紮鎖匙爾爾，三斡兩斡就到大公園。

氣溫十捅度，皮膚干焦磕著空氣就冷冰冰，來公園散步的人閣袂少，檢采是趁無雨屑仔的中晝較燒熱來蹓蹓的，人人衫穿甲密喌喌，膨紗帽仔戴予牢牢，按對面來的大大細細，有人囊手橐仔，無紮的就手䘼挩長長，共手捗包咧。

橫直，就是那行那哈燒氣出來，哈一聲：冷喔！

我共手插橐袋仔，戇神仔戇神來行，不時來共手hiù-hiù咧，予硬掙的肩胛較輕鬆咧，隨閣共手插轉去，鴟鴞肩，跤步伐起來阿西仔阿西。

目睭嘛擘無啥會開，去予昨夜的醉意挽牢咧，攑頭呆呆看彼天頂平平，袂輸卡一緣冰 ——予我閣想起太太的姊妹仔伴，嫁予好額人，煞分袂著、享受袂著，有一句俗語真拄真：

看有食無干焦癮，親像佛祖嗆油煙。

咱人服侍佛祖，攢規桌的三牲四果是真豐沛，佛祖煞愛維持莊嚴，好料的捽都捽無，祀佇遐予香煙硞硞衝硞硞薰，厭氣，真凝喔！

咱人會鬱卒、艱苦，常在是好空的佇面頭前，目睭金金看，一絲仔都捎袂著。毋知就毋知上好，若知傷濟煞得袂著，就會來鬱卒艱苦。現此時網路消息四通八達，啥物好空的、媠噹噹的、貴參參的用一支指頭仔就看會著，準講項項欲挃，拚袂到、不足、癮仙哥，知影傷濟確實毋是好代，求不得的確是苦，人就會齷齪袂爽。

這就是我欲寫批予你的因端，以早，無手機仔連網路都無，人和人欲連絡，就愛展紙攑筆來寫，一張批，就你和我知影，嘛毋知別人寫的批內容是啥。就是按呢，燒烙的紙面和筆骨，孤線路的往回，毋免知影傷濟，有你這迢遙自遠兜寄來的心情，按呢就有夠，按呢就好。

就按呢，佇公園行勻、勻勻仔來行，順樹欉花草讓出來的路，共酒醉和頭疼疏開，硬掙的弓胛，鬱牢的精神，就按呢來放冗、消敨。

轉來到厝，我就來寫這張批予你，我的朋友，我的知己，有你來聽我的心情，按呢就好。

◎刊佇《海翁台語文學》，231期，2021年三月。