【怪奇古】內山彼口袂焦的埤

日本的「怪談」，我將之命名為怪奇古（kuài-kî-kóo），這篇談悔恨的小說，發表於2020年十月，第60期的《台文戰線》季刊。

順山路peh崎起去，路面的打馬膠是烏㽎㽎，剾掉新掃好勢的款，車行起來是穩觸掛順。

太太聽朋友介紹，有一个新過翻的觀光區，聽講景緻袂䆀，健行踏青攏真好，空氣鮮沢，閣通佇山尾溜望海。上媠的，是山塌落去的所在覕一堀水，規年迵天攏袂焦，有影清幽，想講欲𤆬囡仔去游賞看覓咧。

這站仔我真無閒，工課濟甲若山，定定做透暝無睏，實在是貧惰去。相連紲幾个拜六、禮拜加班，這下晡總算清閒，想欲好好仔補眠一下——太太煞受氣，講足久無𤆬囡仔去外口蹓蹓咧，強欲生菇矣 ——伊就使性地，鬧甲，我真無奈姑不而將，咖啡灌一个蓋大罐，就來起行。

車落交流道，按電子地圖來行，盤山過嶺，愈盤我感覺怪奇：

我若親像有來過？

就欲到彼觀光區的入口，倒手爿有停車場，我頭雄雄跩對正手爿去，看著一排拍荒的舊厝，力頭煞節無好勢，掣一趒油門踏傷雄，太太大聲吱落去：

「驚死人喔！你是咧盹龜喔？險險挵著頭前的車。」

「加班遐濟工，我就精神䆀⋯⋯等一下恁入去就好，予我佇車底補眠補眠。」

「你看你！你看你有偌久無載阮出來耍啊！囡仔連鞭就欲讀國中，大漢囉，你毋緊趁這時和伊好好仔鬥陣，閣來就無袂插你矣。」

「我都真忝啊，予我睏一下啦。」

「欲睏就轉去睏，無，咱莫入去，轉去厝裡睏！」

Peh這坎仔我大氣是喘袂離，囡仔衝緊緊佇崎頂頭等，心內的膽嚇予我跤步按怎伐就是伐袂開，來到一个雙叉路口，太太煞起躊躇：

「咱是欲『箍山路』或者是『踅湖路』呢？箍山路較長較崎，毋過會當到上懸位的鴟鴞石，有海景通賞。若是『踅湖路』，咱倒斡就到矣，較輕可。」

「來到遮矣，咱就行較懸較遠的所在，按呢運動較會著，莫去湖彼爿啦。」

「你毋是行甲喘甲，閣欲行較忝頭的喔，你是按怎？面白恂恂，敢有法度過起去，無，咱去湖遐眼一下就來走，莫行彼硬篤的。」

「莫啦！莫啦！莫去湖遐！」

「你講的喔，無咱就來『箍山路』，好，來去。」

囡仔就搢做前，peh無幾个坎，看著路邊祀一塊牌仔，頂頭寫講遮定定有雨傘節、飯匙銃、青竹絲趖出來，逐家愛注意安全。

換做太太面青恂恂，隨共囡仔喊倒轉來。

阮就來『踅湖路』矣。

彼水面和山勢，和我細漢時看著的攏無變，加寡柴枋仔路和涼亭仔爾爾。

「解說牌頂面講，這湖毋但不時滿滇，閣較神奇的是，伊的水沿攏維持仝款的懸度，毋管是落雄雨或者洘旱，規年迵天攏平懸。」

「這所在本底是埤，毋是湖。」我講。

「這內底有寫，本底土名號做內山埤，為著欲共雅化較媠氣咧，才改做湖。」

「這內山埤的水沿本底會起起落落，是有一改風颱暝，聽講有大粒石頭輾落來，共水底的空窒牢咧，水沿才會遮穩觸。」

「你無看牌仔，怎會講的和內底寫的仝款？」

「我細漢就佇遮大漢的，逐工嘛來遮𨑨迌，當然嘛知。」

「啥貨，遮？你講啥我聽無？」

「就佮你講過矣，我是讀冊了後才搬去市內的，佇彼進前，恁大家官是佇遮做山諾。論真講，代誌毋是牌仔寫的彼款，彼大粒石頭就是鴟鴞石，伊猶好好佇山頂，無輾落來，這另外有故事。」

「原來是遮喔，爸爸媽媽捌和我講過，講你出世時蹛踮內山，攏佇山內底四界遨⋯⋯是講，頭拄仔欲來的路，你怎會毋知欲轉來故鄉。」

「我一時無注意啦！而且較早遮嘛無車路，欲入來就愛怙行的盤山過嶺，遮的土名嘛去予拊掉，改做現代的路名矣。」

「會記得媽媽講過，會徙離開是不得已的。」

「是啊，這山頭去予畫做水源地，阮規家伙仔就愛徙走。頭拄仔欲入去停車場的彼跡，有幾若間拍荒的破厝，頭到彼棟就是咱的舊厝。」

「頭拄仔哪會無先講？到遮才拆白。」

「好啦，好啦，彼攏往過的代誌，咱莫閣講矣，來走好無？」

「這是你細漢蹛的所在，毋加看一時仔？乎，你有影好命，佇這景緻遮媠的所在大漢。」

「無媠無媠，蓋恐怖啦。」

「爸爸，你看，遐有龜咧。」囡仔講。

「連囡仔都知影遮的好，你看！閣有鳥仔咧飛，彼樹椏有膨鼠跳來跳去，囡仔耍甲當歡喜，咱加守一時仔，好無？」

「緊來走啦！」

「有啥物好驚的啦？這你的血跡地咧！敢講你並我閣較驚遐的毒蛇？」

「蛇並人閣較無膽，莫傷倚就無代誌啦。」

「按呢，你是咧驚啥貨？」

「彼咧⋯⋯。」

「媽媽，你看！水底有一尾魚，身軀是五彩的，有成鯉魚咧？」囡仔大聲喝。

「彼人放生的啦，以早遮干焦鮘仔魚爾爾，無鯉魚啦。」我按呢講。

「你閣真了解呢。」太太的話帶譬相的味。

「彼時逐工來遮耍，當然嘛知⋯⋯彼時彼時，無聊的時我就看水面，看咧看咧⋯⋯。」

「就看著鬼。」

「你莫共我驚啦！」

「哈，你一个查埔人驚啥啦？」

「你看，山崙的倒照影印佇咧水面，彼山影邊仔的痕，皺皺無蓋清⋯⋯彼是因為風微微仔吹過，起水泱煞來造成的。」

「你閣看甲真幼咧，佇遮做山霸王，做這口埤的主人，有影頂真。」

「頭拄仔的形容，我干焦和一个人講過，我蹛遮時上好的囡仔伴。」

「按呢喔，伊叫啥名？敢閣有咧連絡？」

「早就無矣，彼是足久足久以前的代誌囉。」

「啊伊人今是走去佗位？」

「佇這埤仔底，水的上內底。」

「啥貨！伊人？」

「是，阿坤沉水真久真久囉。」

自彼工開始，我人就無眠，規暝佇眠床頂捙跋反。

見若目睭瞌，隨驚起來，心頭咇噗跳，心神不寧。

想講是人傷操煩，工課壓力過大，才會胸坎縛縛，睏袂落眠。

去予醫生看，講身體機能正常，檢采是壓力大，才會歹睏神。

毋是，毋是，醫生看袂著，醫生看袂著，是阿坤來揣我，阿坤來揣我矣。

我目睭瞌起來隨看著阿坤。

阮攏是猴死囡仔啊！定定相招去內山埤泅水，橫直彼水無蓋深，嘛無啥物危險。規个山坑，就阮兩人咧耍水，按呢泅過來、泅過來，自在閣逍遙，規鉼山和規个天地攏是阮的。

阿坤就無去矣。

我傱轉去厝共序大喝救兵，規粒山的人總拚過來。想袂到，山遮疏櫳煞有濟濟人蹛，規口埤去予大人圍甲插插插，蹽落埤去撈，撈了閣再撈，藏入水底巡閣再巡，就是揣無阿坤伊人。

請童乩來降駕，拜託神明指示，就是揣無人。按呢過三、四個月，規工有人咧揣咧巡，死體嘛無浮出來。

大人講這水鬼真殘，掠交替嘛無放陽體煞，按呢阿坤毋但冤枉死，閣揣無死體來共超渡，真悲、真慘，真正變做孤魂野鬼啦。

彼時，大人共我問過千千萬萬回，我共代誌交代一遍閣一遍，我有目屎哭甲無目屎，有體哭甲無魂，去收驚嘛收袂轉來。無奈何，就共我送去市內蹛，毋敢閣講這層代誌，嘛毋捌轉去。

這是無形的咧牽，或者是聖拄聖，予大人的我閣轉去囡仔時的彼口埤。

阿坤，你到底佇佗位？

我共金紙和三牲四果攢好，綴師公踅山內埤一輾，這斗我錢開真濟，法事嘛做甲真齊勻，向望阿坤的怨靈通好好仔來走，毋通閣來共我膏膏纏。

猶原⋯⋯無效⋯⋯我目睭⋯⋯瞌起來⋯⋯伊⋯⋯佇水中的⋯⋯形影⋯⋯閣⋯⋯再⋯⋯浮⋯⋯現⋯⋯囉⋯⋯。

服侍正神的宮廟、陰的全問過，該辦的事全辦過，就是無效、無效。

揣無伊的陽體，無好好仔化掉，伊就佇咧彼口埤和山內底遨，無度。

我的工課閣催盡磅矣，煞攏睏袂落去，規个人消瘦落肉、瘦枝落葉。

終其尾我人閣佇咧山內埤遮矣。

三十年前這工，月圓，阿坤佇內山埤駐水。

我欲去救阿坤，伊人猶佇埤仔底，猶佇咧。

只要共伊的陽體搝出來，魂靈就會離開這世間，袂閣共我膏膏纏矣。

手電仔炤光光彼跡，就是伊落水的所在。

我藏落水，就欲去揣伊矣，共伊搝出來。

阿坤我來揣你啊。

阿坤我來揣你啊。

阿坤啊！阿坤！彼時，若是我駐水，就會換你來揣我矣。

你死，我死，攏仝款。

我來揣你啊！

我共大人講，阿坤毋是去予水鬼掠交替，是去予一尾大魚欱落去。

無人相信，無人信，遐濟人藏入去水內底巡揣，無人看著，就是無人看著大魚。

我講，踮水內底我親目睭看著，彼魚共阿坤欱入去，魚身就膨起來，退轉去一个空，踮空共水窒牢咧。

山內埤會規年迵天仝水沿，就是彼大尾魚共窒牢咧。

大人無咧信，in干焦相信，山尾溜本底有兩粒大石頭，袂輸一對鴟鴞，是公的和母的蹛鬥陣。有一改風颱暝，看埤仔底破一粒空，驚大水共下跤的徛家沖崩去，人有性命危險，勇敢的鴟鴞公就藏落去水底，共空窒牢咧，犧牲家己，保人平安無事。這內山埤自彼工起，水沿就維修仝款的懸度，無變，鴟鴞母佇山尾溜數念水底的鴟鴞公，嘛守護咱規粒山和徛家

無效，猶原無效，猶原去予政府畫做水源地，全hőng戽走。

賰鴟鴞石和內山埤佇遮，踮這時，成做觀光區，予人來遊覽。

煞毋知遮以早有蹛人，有人死，有故事，有地理，有大妖獸。

我蹽落水，佇人欲藏落水的時陣，看著有波咧浡，直直浡起來。

敢是阿坤？

是彼尾大魚，浮頭，對我。

我毋驚，我無咧驚，我一步行對魚喙遐去。

煞鼻著𣻸𣻸的味，聽著彼細微微的，鱗咧振動的聲。

細漢時我死無去，本底是我愛來駐水，去予大魚欱入去；是阿坤救我，代替我，做魚仔的餌，予大魚食粗飽，予這口埤飽滇。

埤若飽滇，山就飽滇，大人按呢講。

伊攏舞毋著去矣，毋是鴟鴞的功勞。

大魚的喙開甲大大，我就欲入去矣。

天頂傳來大聲吼叫的聲，魚仔聽著，煞來翸，滾絞甲。

一隻遮天的大鴟鴞飛倚來，爪仔峇倚來，欲去掠魚仔。

大尾魚反身，用尾去翸，暫時共拍退，鴟鴞展爪閣欱。

規口埤就來起大湧，大魚和鴟鴞捙拚相戰，場面真恐怖。

就佇這時，鴟鴞的爪仔共魚仔腹肚捏牢咧，愈捏愈出力。

大魚喙開開，敢若佇咧吐彼款，共腹內的彼物件吐出來。

月對雲行出來，大港大港的光，炤落山塌落去的這口埤。

水面是遐爾平靜，微微仔風吹，略略仔有泱出來，皺皺。

我就鼻著葉仔、石頭、露水、青苔敆做伙彼𣻸𣻸的氣味。

耳仔清楚聽著浴槽仔窒仔拔掉，水佇咧洩佇咧絞的聲音。

我目睭瞌起來，啥物都無看著矣，一切就來消散恬靜去。