愛看脫衣舞的人
伊號做Kú-leh，蹛佇葩哩（pha-lih）這座城市，四十外歲仔人，無結婚，嘛無固定的頭路，徛踮這城市上䆀上腌臢的所在，佇地下室稅三坪大的房間，干焦一頂眠床、一葩燈、甌仔和幾本仔冊和伊做伴。
天拍殕仔光，Kú-leh就去果菜市場揣機會，看通鬥mooh果子箱仔鬥捾菜蔬趁寡所費。這穡頭毋是逐工有，準無外路仔通趁，就閣轉去睏，腹肚較袂遐枵。若有趁著，伊就共錢袋予牢，佇街仔路遨，等暗頭仔拚頭一个入場去看脫衣舞 — — 這是伊上大、嘛是唯一个趣味。
按呢的日子自伊出社會就按呢，和爸母親情朋友都無連絡，就按呢過日子都真好啊。葩哩這座城市真好額嘛有夠穩觸，通維持仝款的奢華、仝款的飄撇規百冬，無論時代按怎變化、科技按怎演進，拄著戰爭啊天災地裂猶原是按呢，就是按呢逍遙四序。
有一工，Kú-leh佇市政府的告示柱仔，看著紅艷艷的海報：當時仔有國外來的脫衣舞大團欲來公演，欲連紲跳一月日。
這予手袋佇咧褲袋仔的Kú-leh共手捏閣較絚矣。
脫衣舞大團的票聲不止仔好，票價當然綴咧衝懸，興脫衣舞的Kú-leh心有夠擽，躊躇真久真久，落尾決定欲來去看覓。
手面趁食的伊，無儉甲半仙錢，嘛堅持無愛和人借錢，伊就全無食飯無開錢，拚咧共三工趁的儉起來，拆一張上俗的票，位是佇劇園三樓毋是上邊仔，頭前煞有一枝柱仔半閘咧 — — Kú-leh無掛意，看著遮麗倒遮氣派的場面，伊歡喜都袂赴矣，位好位䆀無要緊，要緊的是看著舞者共跤腿躘予懸懸，徛規排共頂身的衫剝起來，彼白拋拋的奶仔㽎咧㽎咧，有影是光彩，媠甲無比止。
彼暗，自戲園行出來的Kú-leh，看著天頂閃閃爍的星，就像舞者的奶仔頭，予伊心肝頭的樂暢歡喜，漲到人生的上懸位。
自彼工開始，Kú-leh規工都回轉去想看舞的情境，日思夜夢攏是大團的脫衣舞，對往過去的遐的粗俗的店仔就一屑仔趣味都無矣。
是講，葩哩市去予這大團抐甲欲起痟，票價綴票聲大大漲懸，Kú-leh足想足想閣再去看一擺。伊就攏無食飯矣，去央果菜市仔的貿頭予伊穡頭，骨力去mooh瓜果菜蔬，做完就轉去睏，用眠來止枵。
按呢一工兩工幾若工，總算予伊閣拆著一張票，隔轉工欲去看大戲囉。
歡喜是歡喜甲，煞是枵甲忝甲，爽的滋味和疼的感覺絞做伙，予伊睏都睏袂落，佇眠床滾絞絞滾。
票拆好，伊猶賰十五箍銀，忍不住的伊，就自地下室濆出來，四界揣食的，揣著一間半暝猶開咧的酒館。
Kú-leh手提菜單，相真久真久，徛邊仔的服務生嘛等真久真久，忍不住來問：
「這位人客倌，有啥物問題是無？予我來替你服務好無？」
「啊！歹勢，我閣咧躊躇，是欲點俗麭kauh？或者是麥仔酒？」
「阮的俗麭kauh真好食喔，麥仔酒嘛蓋好啉。」
「我是想欲兩項攏點，毋過我褲頭仔干焦十五箍，這兩項攏拄好十五，我干焦會當點一項，實在毋知按怎決。」
「喔，先生你勻仔決，我勻仔等。」服務生踅身、反一个仔白睚欲來走。
「喂，等一下，我問你。」Kú-leh喙覕覕，白蔥蔥。
「先生請問閣有啥貨咧？」服務生的氣口無蓋好。
「彼號，我就三、四工無食飯啊，想欲用俗麭kauh硩腹，閣想欲啉麥仔酒麻痺，煞干焦十五箍，欲按怎？」Kú-leh問。
「甲按呢，我會先來食飽才講，麥仔酒隨時會當啉。」
「毋過，我都無錢矣，想講明仔載就欲去看大團的脫衣舞，若無麥仔酒麻痺，會歡喜甲睏袂去⋯⋯猶毋過，若無食飽，我嘛會睏袂去。」
服務生閣較無歡喜矣，想講這位穿插垃儳歹面腔的查埔人，按算欲來用賒，就徛佇遐噷噷無講話。
「你敢知，頂日仔我去看大團的脫衣舞，看著規排查某的跤腿遐爾媠、奶仔遐爾金滑，是我這世人上歡喜的時陣，你敢知有偌好，你有看過無？」
「我就無閒咧捀盤仔，無彼款葩哩葩哩的時間。」
「按呢喔，歹勢，共你攪擾，我是枵過頭矣，烏白講話。你嘛知大團的票是貴參參，in月底就欲巡迴去別的都市矣，我儉腸凹肚去果菜市仔mooh箱仔，趁著一張票的錢矣，閣欲來去看矣，你看，我買好矣。」
Kú-leh自橐袋仔共票扲出來，展予服務生看，雄雄目睭展大蕊講：「啊！我想著矣，我明仔載免做穡，免氣力，我點麥仔酒好啦！」
「好，隨來。」服務生越頭去櫃台，隨共麥仔酒捀起來。
「你敢知，看彼脫衣舞是偌好拄偌好。」Kú-leh歡頭喜面那講，服務生用開仔共蓋撓開，倒入去躼跤玻璃杯仔，罩一緣沫勻勻仔衝起來，到杯仔口拄好擋恬，一屑仔囝都無泏出來。
Kú-leh目睭金金看，講：「多謝啦！嘛真歹勢，予你等遐久。」
「我人啊無愛看脫衣舞，我便的就有姼仔矣，逐工嘛有通看。」服務生偷笑。
Kú-leh做一喙就共麥仔酒硞了了，拍一下大大的呃：「喔，險險就齪死⋯⋯我嘛毋是無機會，是講查某人若有表示，我就會躊躇再躊躇，想講和伊做伙好無？我就無錢無固定頭路，會共人礙著，和我做伙袂幸福啦⋯⋯是講，我嘛攏無表示，就按呢躊躇到尾矣，機會一个一个無去，到今猶是一箍遛遛。」
「共捽落去就著啊！莫想遐濟，代誌尾後才講。」
「彼就前塵往事矣，今我一个人真好，有脫衣舞通好看，閣有這大團予我暢甲掠袂牢。準我有姼仔逐工磕，就袂遐爾仔爽快。」
「帶感情通逐工磕的都偌好你敢知，你毋捌啦！」這話服務生無講出來，干焦佇心頭喃。
「哎唷，人生按呢躊躊躇躇就過矣，真無彩⋯⋯我後悔矣，早知就點俗麭kauh，這麥仔酒煞愈啉愈枵。」
「毋捌看過遮愛看脫衣舞的人，好啦，這麥仔酒我請你啉，另外閣攢俗麭kauh替你止枵。」
「真多謝咧！」Kú-leh喙笑目笑。
服務生就去櫃台遐送單交代，越頭看著Kú-leh共十五箍撏出來，舒好好囥踮桌頂。
隨後，是脫衣舞的票，伊千辛萬苦枵腹肚換來的票，扲予牢牢，那相那戇戇仔笑。
Kú-leh的目睭，有光咧爍，袂輸自鬧熱歡喜的葩哩市夜空發出來。伊的心肝頭，全是期待和向望，彼款的飽滇和樂暢，綴舞者的跤腿和白鑠鑠的奶仔，㽎咧㽎咧。