按焦鬆起蒂，舊新伨頭的嘉美館

拋荒踮遐，予時間的坱埃掩閘（om-tsa̍h），徛佇奢颺的嘉義車頭斜對面，袂輸薰酒篋仔，直直無閣拍開。

今，伊按薰酒公賣局的辦公廳來過翻，加添一跤玻璃盒仔，舊新相敆，來共所在楦予闊、汰予光，成做新嫣掛古味的「嘉義市立美術館」。

專賣局嘉義支局，是1936年彼日本時代來起的，由台南林百貨、台北松菸、新竹專賣局的建築師「梅澤捨次郎」來扞頭設計。

舊館體掠踅角出來，弓一款媠氣的形，彼漚綠色thài-luh秀面，和（hô）平棒閣對對的頂下挩窗仔，仁仁的靘（tshínn）有影是睨睨（gîn-gîn）。

新館體佇路的另外彼頭，嘛用鋼框玻璃來掠踅角，窗仔門懸低大細有科技感，毋是透光就是重青色，敢若咧趁樣舊館，其實是好意來呼咻，過去和未來就來對話。

舊館內底，有四角形的踅螺梯迵天，嘛有方窗一扇一扇相疊拄天，二樓祀一支大柱，聽講象徵「八紘一宇」，是規棟厝的精神中柱。

踏跤步peh懸peh落、擔頭向頭來體會，不時有日頭光炤入來，踮徛堵、手扞仔、磨石仔塗跤和素色的壁，拗摺彼軟絡（nńg-le）光影，有影予人興興閣眩眩，可比用跤步來捘的萬花鏡。

門喙本底開對大條路（中山路），欲成做美術館彼時，新時代的建築師變竅來踅頭，踅對內爿面的塌窩來迎客，後埕變做前埕，面對社區，予這美術館毋但是孤獨的建築體，是釘根在地和市民跋感情的藝術有機體。

參觀者就愛步輦過門埕才通入藝術的門。門埕的鋪排袂輸花園，清幽仔清幽，跤路著略略仔彎、略略掠過，草仔花箍起來的花台可比水泱（tsuí-iann），樹仔猶幼枝，葉仔疏疏櫳櫳tòo開，這款的𤆬領袂逼、無壓力，予人那遊那賞，就來行入藝術的門徛內。

一樓是拆票和寄物的所在，當面就有壁堵用闊身的輸出拍開這期的展覽主題，探入去內底面來和藝術初見面。

紲來，層層來登高，二樓的大廳有三樓懸，透光的徛窗是光龐龐（kng-phiāng-phiāng），會當講是：

束結，清氣，通俍。

予人真爽心，不止仔大派，這是嘉義的藝術大客廳。

二樓大廳的內面嘛有展覽區，邊仔角有以早的酒類倉庫守牢咧，現此時做特展區，共展覽品和深落的氣味包起來。

拄入去定著會攑頭看，彼鐵架和楹仔搭起來的三角天篷，共人的眼界搝懸挩遠 ——予我來想著嘉義市另外彼頭的東市場，內底的豬砧是一座百年的太子樓，天篷嘛是三角形的，挑俍甲。

東市場徛東，嘉美館踮西，一東一西，是迒時伐位（hānn-sî-hua̍h-uī）的相對看。

新館的四樓尾，有日本技術高壓束形的集成材，來共大廳的徛窗tshāi予懸，崁佇上頂頭的樓尾頂。

而且用這勇閣光生的新科技建材，做彼可比船肚、閣較像海翁膁肚的線條，憑頭排列，予大廳的天頂是閣較氣派。

有舊料嘛有新材，木的元素敆不止仔濟，這是欲來共嘉義往過木業的文化來相紲連。

彼時對阿里山剉松梧運樹身落山踮嘉義liâu柴，是一款會集，平洋山海四面八方物產交通來遮，人才和藝術嘛來遮相會。

美術館的號頭閣真有意涵，桃仔色代表諸羅古城號做「桃城」的歷史，赤殕色代表木業城市向時（hiàng-sî）的光榮，袂輸架仔按呢來相對，時間和空間相會，攏佇咧美術館內底。

這是陳澄波、張義雄、林玉山雙跤踏過，鐵馬騎過的土地，澄波先的油畫〈嘉義街中心〉共人和樹仔和厝促（tshik）去邊仔，閬大塊大塊的塗跤面出來，用各款的黃抹出彼日頭光䖙踮塗面的焦鬆，嘉義的四序和清閒就是按呢生，牽濟濟的色水和線條做伙，出一位一位的大藝術家，人講是「畫都」。

今，終其尾有一座正範的美術館出來，規畫周至，設計幼膩，遐爾仔齊勻，舊料和新裁鬥搭，有影是貫串紲拍。

就按南國光日的焦鬆起蒂，共這城市原底的塗肉來洗汰，激一款蔥脆的媠形出來。

有古早的底蒂，有現代之新嫣，一座舊新相伨的美術館就來徛起。

◎攝影：鄭順聰

◎刊佇《海翁台語文學》，232期，2021年四月。