【現代鬼仔古】求婚電影
女子：喂，媽！我這馬坐高鐵轉去，到台北會較晏喔，你就較早睏咧，免等我⋯⋯好啦！好啦！你莫閣問矣啦，寶釵姨人真好無毋著，欲介紹對象予我是真好⋯⋯毋閣，這站仔公司蓋無閒，拜六、禮拜攏愛加班，你替我共寶釵姨說多謝⋯⋯好啦！好啦！高鐵欲開矣，手機仔信號會斷去。
高鐵廣播
各位旅客恁好，咱這幫車就欲行到台北，車頭會停踮：台中、枋橋，台北，祝你旅途平安順序。
OS
彼位女子，共相親的機會推掉了後，就來上網掰手機仔，伊三掰四掰，掰著一齣線頂電影，名號做《免躊躇，求婚就著啦》，影片拄開始，男主角佮女主角按呢來講話。
手機仔內底
男主角：淑芬，咱兩人鬥陣，已經行十冬矣，你知無？
女主角：是啊，家豪，想袂到時間過遮爾緊，若親像天頂的飛機，塗跤的高鐵，袂輸咱頭前面看著的水上機車。
男主角：哎，時間過遮爾緊，你敢知，我這改𤆬你來墾丁𨑨迌，佇這个海沙埔、這个暗頭仔的五彩的夕陽頭前，我想欲⋯⋯我想欲⋯⋯
女主角：你想欲按怎⋯⋯
男主角：我想欲對你講，ke⋯ke⋯ho⋯ho⋯
OS
就佇男主角開喙欲對女主角求婚的彼个坎站，雄雄有痟狗湧拍過來！共男女主角和求婚的手指，全捲捲去。
落氣的音效
啊，求婚失敗！
OS
坐高鐵的女子發現手機仔強欲無電矣，就共耳機剝起來，換用隨身的充電器插空。
女子偷看隔壁位的女子，仝款咧看彼影片，仝款是攑i-phone8，耳機和充電的是同仝一个空。
有我就無你，有你就無我。
OS
《免躊躇，求婚就著啦》這齣電影的故事真簡單，男主角手指買好勢，想欲變大齣頭，轟轟烈烈來求婚。無疑悟，見若撏手指出來欲開喙的時陣，毋是落大雨、霆雷公、失電，就是出車禍，橫直啥物譀古的代誌都會發生。
電影搬到落尾的大結局，男主角稅一隻遊艇，載女主角來到河中央，兩个人心內知知，這改求婚一定會成功。
男主角踅身去捧199蕊玫瑰，閣踅轉來欲求婚的時陣。
OS
彼个看影片的女子，目睭皮瞌起來，煞來盹龜。
手機仔內底
女主角：寫這跤本的編劇閣真低路！見若演到尾仔，觀眾攏會睏去。
男主角：哎唷，你就緊來予我唚一下，答應我的求婚，咱就會當散工去食宵夜囉。
女主角：你做一个查埔人嘛較有志氣咧，你看這塊影片點閲率遮爾仔低，才69改，䆀甲無底！
男主角：好啦！好啦！咱改一个較刺激的結局。
女主角：若無你欲按怎改？
男主角：交予我就著，處理我OK！
高鐵廣播
咱的車幫就欲到台中站矣，落車的時陣，請共物件紮予齊著，月台的空縫嘛愛張持、細膩。
OS
聽著高鐵咧放送，女子就來精神，眼著「全劇終」三字，面憂憂，無奈何，就來上面冊，看來是無啥代誌。伊就閣轉來看影片，伸指頭仔去搝手機的螢幕，一塊黑暗挩過，影片倒絞，轉來到男主角踅身去捧199蕊玫瑰彼當陣⋯⋯
手機仔內底
女主角：你呔會跳落水啦？危險啦！
男主角：請你允我，答應嫁予我，佮我永浴愛河，好無？
女主角：這句話我等⋯⋯等足久足久啦！我允你，我願意嫁予你。
男主角：OH！YA！若是按呢，請你嘛跳落來，好無？
OS
影片的畫面內底，女主角嘛綴咧跳落水，一塊黑暗挩過，坐高鐵的女子踅踅唸講：「毋捌看過遮歹看的電影，漚甲無一塊。」
就佇這時，髙鐵車身軁入去磅空，手機仔的訊號斷去，影片袂振袂動。
手機仔內底
女主角：攏是你害的啦！害我規身軀澹漉漉，冷甲欲死，凄慘落魄。你看，觀眾嘛無佮意，撟甲欲死。
男主角：我才凄慘啦！199蕊的玫瑰花散了了，求婚的手指嘛無去，輾落去水底矣啦。
女主角：像這種無板無嘹、無頭無尾的戲，鬼才會看啦⋯⋯害矣啦，咱以後無演出的機會矣啦，我、我、我拒絕你的求婚！
男主角：袂當，絕對袂當，你定著愛允，一定愛答應，愛有十全的結局才著，觀眾才會繼續看咱的戲。無，咱以後就無演出的機會，會永遠永遠消失踮螢幕內底。
女主角：啥貨！遮嚴重啊⋯⋯欲按怎辦？我啥物攏袂曉，干焦會曉搬戲，這聲是欲按怎呢？
男主角：允我。
女主角：允啥物？
男主角：無時間解釋，橫直，允我就著。
女主角：允你了後，敢講，咱就有新戲通搬？
男主角：是，正正是，永遠永遠。
女主角：為啥物？
男主角：莫問遐濟，Say⋯⋯ Yes。
女主角：嗯⋯⋯好，我允你：Yes，I Do！
OS
螢幕閣再跳到「全劇終」三字，女子面色青恂恂，閣共影片搝倒轉去，經過長長、長長、長長長的烏暗了後，影片正正是一塊黑暗，敢若有水咧流，流來流去，勻勻仔有一跤物仔，略略咧爍，爍爍顫⋯⋯彼是求婚的手指，踮烏暗沉落去，沉落底⋯⋯就佇這个時陣，指頭仔伸出來，共手指掛起去。
OS
指頭仔自螢幕捅出來，現手指出來，爍爍顫。
高鐵車箱全女子慘叫的聲
隔轉工，《免躊躇，求婚就著啦》這塊影片點閲率，袂輸咧起痟，衝到五十萬閣一佰九十九改。
500,199
全劇終