迎秋光
Sep 17, 2024
敢著愛行出門,才會應得迎(ngiâ)秋光?
早前我是按呢想的,嘛按呢來做:
去peh秋風透規山坪的懸山,心頭綴山陵的草埔起起落落、拋過一陵過一陵,是偌爾仔闊心啊!
或者跤踏車騎咧,佇小城的恬靜路面自在咧行,有當時仔軁入去巷仔內,就和一間枋仔厝相拄,內底無蹛人矣,伊的身世關密密,我探頭去看,就共秋天揜貼的媠收予起來。
早前我是按呢想的,便若秋天到,便拍殕仔光,就愛出門去看、去感受秋意,才袂對這規年迵天上四序的季節不住。
是講,就佇這延延無牽礙的晝拄睏精神,我目睭沙微仔沙微,眯著窗仔簾透入來的日頭光,佇壁面得定,微微仔咧爍。金金看的我,共這幾十冬看著的、感受的秋凊,像反冊掀紙頁樂暢起來。
我都免出門,想講來放Debussy的音樂,泡一甌咖啡,讀幾段仔Proust,就通迎接這季的秋光。
就佇這時,日頭光化去,唯一的光源無去,室內暗落,啥都看袂明,目睭擘金干焦掠著壁面的時鐘,針寬寬仔踅,秋光當咧一秒一秒走無去。
我心驚惶,敢講是秋光無歡喜,著愛行出去共安搭⋯⋯壁面雄雄閣光倒轉來,像薄紙著火燒甲緊緊,室內再現光明。
我咧想,拄才仔共日頭遮掩的雲,是偌大蕊咧?伊欲去佗位?
自日頭的面頭前飛過,代替我,來迎接秋光?